首頁 arrow 綠色短評 arrow 一個海外中國人的良心話

一個海外中國人的良心話 PDF Print E-mail
Written by 李南衡   
Wednesday, 13 February 2019

  2018年十二月底,《自由時報》刊登一個海外中國人王守悉的一篇文章,標題是,大陸青年代表14億中國人民,向台灣道歉!其實he是十一月十五王先生佇“You Tube”頂面發表的一篇有聲無影的講話。一開始tio̍h講伊為啥物beh代表14億中國人民向台灣會失禮。因為中國七十年來對台灣的威脅、打壓、恐嚇,是錯誤的、是完全無掩蓋的國際霸凌行為,應該tio̍h停止。中共欺負台灣是以惡欺善、以強欺弱。伊佇海外chiah濟年,看過接觸過世界各種人,台灣整體來講,社會平均的信用度信任度、溫良恭謙讓的程度是超過大陸人的平均。

伊開始切入主題,伊講伊客觀的觀察,中國上大的問題m̄是台灣,是中國共產黨。中國腐敗文化m̄是台灣創的,所以beh問你,台灣有kāng你叼一項?台灣人有kā你強拆厝無?佇中國有「防火牆」無愛hō͘中國人自由上網去接觸tio̍h外國資訊,「防火牆」是台灣人設的是bo͘?北京、河北的霧霾烏天暗地,是台灣人舞出來的是bo͘?三氯氫氨毒牛奶粉、毒豬肉、假疫苗是台灣人舞出來的嗎?佛寺hông拆掉、m̄ hō͘你信佛祖,中國真濟教堂hông拆掉、m̄ hō͘你信基督教,he是台灣人來拆的嗎?台灣人發動文化大革命嗎?台灣人發動大躍進嗎?江澤民家族的幾千億美金,江澤民是台灣人嗎?你生第一個囝仔,恁某tio̍h hông掠去縛掉be-koh生,是台灣人kā你舞計劃生育嗎?Chiah-ê攏m̄是台灣人創的,恁chiah呢氣台灣人創啥?台灣人kah你有啥物深仇大恨?     

有一點我實在看bē落去tio̍h是罵台灣落後、笑台灣散。台灣每人平均GDP是美金二萬五千五百外,中國大陸三十一個省級行政區內底,無一個省抑是直轄市的GDP有比台灣khah懸的,北京上懸是美金一萬九千八百外,第二名的上海mā才美金一萬九千七百外,全中國平均是美金八、九千元。台灣的GDP是中國平均GDP的三倍左右,台灣tang時仔散?     

我認為台灣是全世界上優秀的國家,是黃種人、亞洲人上優秀的國家。台灣真正民主,一人一票,政黨會使輪替,言論自由。香港、新加坡攏做bē到。我認為台灣的民主自由開放程度嬴過韓國、日本。台灣的言論開放,思想開放,台灣人敢講的程度超過韓國、日本濟濟。台灣無韓國、日本hiah呢排斥外國人,台灣mā比韓國、日本koh-khah願意接受西方入來的新思想新觀念。     

絕大多數的台灣人攏是非常熱愛和平,in干單想beh好好過日子,買厝還貸款、四界旅遊、有閒sē夜市仔,過「小却幸」的生活。台灣並無講beh攻打中國,台灣人mā m̄是hiah愛相戰。台灣有kā你按怎?那會beh直直欺負台灣?
 
< Prev   Next >