首頁 arrow 綠色短評 arrow 世代交替kah政二代

世代交替kah政二代 PDF Print E-mail
Written by 李南衡   
Wednesday, 13 February 2019

一月二七,台北市大同、士林區立法委員補選,台北市長柯文哲提名伊的子弟兵陳思宇作白色力量的候選人,伊少年少tak、第一遍出來競選公職tio̍h目睭底無人,罵其他的候選人是「連勝文們」(台灣話的意思是:In hiah-ê連勝文),指責別人攏kah連勝文仝款是「政二代」,伊記得照鏡,伊的老父陳建銘bat作過立法委員、是現任的台北市議員,伊本人敢是「政二代」?

仝款,另外一個「政二代」洪孟楷,bat作過中國國民黨文傳會副主任委員、目前是中國國民黨發言人,伊的老父洪璽曜,bat作過台鹽董事長(經濟部代表董事)、國家發展基金會執行長,伊的老母郭素春bat作過三任的立法委員。伊有意思beh tī 2020年投入新北市淡水、林口區立委選舉,伊喝出「世代交替」,明明是「洗面礙tio̍h鼻」,中國國民黨佇chit區的前立法委員吳育昇,認為洪孟楷傷過自大,伊問講:敢講立法院比洪孟楷khah濟歲的攏應該hông世代交替lō͘?果然,年紀比洪孟楷khah大的中國國民黨立法委員賴士葆跳出來講:世代交替無應該成作家己人內部的鬥爭對立。伊暗暗仔khau削講,年紀khah大的tio̍h通過選票嚴厲的考驗,但是有一陣政二代、富二代佇hia纏頭絞尾霸佔tiâu-teh,搖bē振動拍bē破!     

真正民主自由的國家攏無chiah-ê問題。日本現任的首相安倍晋三,伊是日本第九十任、第九十六至九十八任首相,伊的老父安倍晋太郎bat作過日本外相,伊的外公岸信介kah外叔公佐藤榮作攏bat作過日本首相,無人罵伊是「政二代」抑是「政三代」,顚倒謳咾in「一家三首相」。美國第四十三任總統小富施(George Walker Bush)作八年總統,嬴過美國第四十一任總統、in老父老富施(George Herbert Bush)干單作四年總統,小富施競選總統的時,無人罵伊是「政二代」。     

第二次世界大戰後,艾德諾(Konrad Adenauer)佇聯邦德國擔任第一任德國總理的時七十三歲,一直連任到八十七歲,chit中間無人喝講tio̍h「世代交替」,民主自由的國家,m̄是啥人講tio̍h算數,是大多數人民支持伊,你有啥物閒仔話thang講?美國國會連續擔任眾議院議員五十三年的康嶺斯(John Conyers),tī 2017年十二月初五宣布退休,因為伊食bē消幾若件性騷擾的指控。完全是伊家己作得來的見笑代落台的,kah「世代交替」一點仔關係都無!     

真奇怪,今仔日台灣已經是一個民主自由的國家,任何人想beh競選參與政治,完全看人民有合意你抑無。竟然有中國國民黨無仝年齡層的政治人物,猶teh講政二代、世代交替,敢m̄是中tio̍h中國國民黨獨裁專制、無民主的毒傷深?
 
< Prev   Next >