首頁 arrow 綠色短評 arrow  柯p敢免講兩句仔話?

 柯p敢免講兩句仔話? PDF Print E-mail
Written by 李南衡   
Wednesday, 20 February 2019

 分別由美國議院kah參議院提出的「台灣旅行法」,舊年(2018)三月十五,由美國Trump總統簽署生效,鼓勵美台之間所有層級官員互相訪問。今年二月初七,該法案的共同提案人美國聯邦參議員邱汝滋Ted Cruz,已經kah賈德那、呂比謳、許頓、許寧四位共和黨聯邦參議員聯名寫批hō͘民主黨籍的眾議院議長白露絲(Nancy Pelosi),敦促伊邀請台灣總統蔡英文會tàng tī「無偌久的將來」訪問華府,而且向國會兩院聯席會議發表演說。

師範大學政治研究所范世平教授佇伊的面冊頂面表示,柯文哲一月十八日批評蔡總統的親美立場,kā比喻講那像一個強盜去搶銀行,法官問強盜講,你敢無看tio̍h邊仔有一堆警察,強盜講干單有看tio̍h錢無看tio̍h警察。「Chit-ê理論是tio̍h,但是你bē記得猶有一個中國」。范世平教授講,柯文哲那像認為,中國是維持正義的世界警察,柯文哲的chit種講法引起紛紛的議論,mā造成柯文哲的支持度大跋;「今仔日chit間銀行beh邀請強盜去演講,五位美國參議員tī二月初七聯名寫批hō͘聯邦眾議院議長白露絲,希望伊邀請蔡英文tī『無偌久的將來』訪問華府,而且佇國會演講」。范世平教授小小kā柯文哲刨(khau)削講,「Hoho,m̄知柯文哲心目中的hit位警察beh按怎反應?」  

 柯P猶未出聲,二月初八,中國國民黨發言人洪孟楷緊表態講,美國是咱佇國際上的重要同伴,會tàng互相往來絕對是正面肯定的。續落去龜腳隨時趖出來。伊講伊mā beh呼籲蔡英文政府,「千萬m̄-thang tī選舉年為tio̍h家己連任利益用盡心思來操作美中關係,若按呢干單會犧牲掉台灣人民的利益。」有人罵中國國民黨那會按呢phô͘咱政府的後腳?其實in是拚勢tī in頭家中國共產黨猶未出聲進前,緊罵咱的政府罵咱的總統hō͘中國聽。按呢猶無夠,二月十四早起,中國國民黨智庫召開「全民共識kah外交政策座談會」,指責蔡英文總統ùi今年開始漸漸啟動「聯美制陸(中國)」的戰略,推動批中共、反中共kah挑戰中國、giú美國鬥陣的政策,由陸委會主委陳明通kah外交部長吳釗燮負責執行,目的tio̍h是beh盡量挑起美陸(美國kah中國之間的)矛盾kah衝突。若照柯P的講法,是強盜giú銀行來鬥警察。比柯P koh khah有奴才的氣口。   

一月十八,柯P kā台灣比喻作強盜、kā中國比喻作警察,習近平龍心當然大歡喜。咱看chit遍柯P若無好好表現,伊奴才的身份直直beh hō͘中國國民黨搶去。Chit-ê時陣,為tio̍h表示對習大大的忠心,為tio̍h 向習大大交心,柯P敢免講兩句仔話?
 
< Prev   Next >