首頁 arrow 綠色短評 arrow 歷史be7 tang3扭曲、ma7無法度假設!

歷史be7 tang3扭曲、ma7無法度假設! PDF Print E-mail
Friday, 12 June 2009
      「美麗島事件」發生了無偌久,陳若曦女士ui3美國拼轉來去見蔣經國總統,講伊所瞭解e5「美麗島事件」是「未暴先鎮,鎮而後暴。」是m7是因為按呢影響政府辦案無「趕盡殺絕」、擴大掠人及嚴辦,我m7知,總是hou7真濟台灣人對chit位有智慧、有勇氣e5作家深深感謝。當時王詩琅、龍瑛宗、楊逵、巫永福、王昶雄、郭水潭等成十位台灣前輩作家,特別佇北投辦桌請伊。每一位前輩作家及伊握手e5時,m7是目箍紅紅tioh8是目屎chhop8-chhop8滴,攏講仝一句話:「真多謝你!」

        前幾工,接tioh8朋友轉寄來e5一篇文〈一個甲子,歷史會tang3重演幾遍?〉,作者是我所尊敬e5作家陳若曦。我懷疑chit篇文有影是伊寫e5

  文章寫講:陳水扁變本加厲推捒「一旁一國」,兩岸關係koh khah緊張,ka7台灣捒入鎖國及孤立狀態。為tioh8深耕「本土」拼勢「去中國化」...外省及本省隱然成作對立族群,「愛台灣」才是政治正確,意識形態凌駕一切。煞hou7我想起大陸文革時「愛毛主席」e5口頭語。幾位博士級e5大官,言行激進粗鄙也親像「紅衛兵」再世。兩個「文革」有啥差異?規模及暴力大小而已。

  台灣hite5官員若有影親像「紅衛兵」,國民黨早前e5大官敢有thang hiah好食睏?台灣hit陣敢會使算作是「文革」?中國文革迫害死國家主席劉少奇、大元師彭德懷,迫害學者熊十力、作家田漢、老舍自殺。報導講:「成千上萬人死亡,數以百萬計e5人受tioh8暴虐。」台灣hit陣到底有偌濟人受迫害死亡抑是自殺?拜託舉一個例tioh8好。若無,兩個相差m7是「而已」,是「無限大」!

  陳女士講:會記得馬英九作台北市長e5時推動「糞埽無落地」,台北市容加真清氣加真美,真緊就聽tioh8大陸做環保人士表示欽佩koh向望「北京會tang3 chhoa7頭來做。」

  歷史真殘酷,事實就是事實。阿扁前總統執政期間e5台灣,無論你按怎想按怎講,ma7無法度及中國e5文化大革命比並!無論你偌呢怨慼阿扁,偌呢合意馬英九,「糞埽無落地」猶原是一九九五年阿扁作台北市長時e5政績。

  文章koh講:我定定想,蔣經國總統可惜死了傷早,若無伊m7但佇伊臨終前解除《戒嚴法》、開放黨禁、報禁及大陸探親等。Ma7應該會對「二二八」做反省及補償才tioh8。歷史真殘酷,無hit號假定性e5「應該會」按怎才tioh8。歷史是記事實,蔣經國總統臨終前幾年,發生美麗島事件、林義雄家媽孫血案、陳文成命案、江南命案。Chiah-e5攏是事實,歷史會記chite5代誌。

 
< Prev   Next >