首頁 arrow 綠色短評 arrow 去kā日頭射射落來!

去kā日頭射射落來! PDF Print E-mail
Written by 李南衡   
Wednesday, 20 February 2019

 

  高雄市長韓國瑜前一站,針對台北市議員王世堅講伊的戰力超越過中國國民黨的「四粒日頭」,伊家己比作后羿(Hō͘-gē),致使hō͘人解讀作伊2020總統大選缺席。針對chit點,一月二八韓國瑜表示「無chit號代誌」,伊會按呢講是因為「后羿是beh來射日頭的,天頂bē-tàng有兩粒日頭,地上bē-tàng有兩個君王。Taⁿ有三、四粒日頭,咱知若是有兩粒日頭地球上的人類tio̍h會熱死ah,何況有三、四粒!


 

 

 「后羿射日」是中國古早的神話故事,有真濟種版本,講法攏無相siâng。咱提其中一種版本來講,tī帝堯時代,天頂出現十粒日頭,日頭猛(mé)kah農作物攏枯焦(ko͘-tâ)去,草木樹欉乾乾死,人枵餓嘴乾。帝堯派后羿去射日,伊kā九粒日頭射落來,留一粒佇天頂。人才有法度活落來到今仔日。   媒體問韓國瑜伊若beh射日,敢有按算beh先射叼一粒?韓國瑜緊講:「Chit陣講tio̍h 2020會傷敏感,我是講笑的,m̄-thang傷掛意。」伊強調,設使伊市長若作無好,「市民罵我,我tio̍h kā家己對千千砰掉!」  

 韓國瑜市長按呢講tio̍h差去ah!去看任何一本神話傳說的冊,查̍「后羿」,伊除了射日以外無別項記載。韓國瑜既然講家己是后羿,tio̍h應該去kā日頭射射落來!你看中國國民黨hit四粒日頭,叼一粒m̄是刺giâ-giâ、熱phut-phut,koh充分發揮in黨「內鬥內行」的黨魂、互相iah孔,韓國瑜先射叼一粒攏無要緊,一粒一粒射落來,射了若手ngiau,順續kā代表中國國民黨hit粒「青天白日」射落來,mā有真濟人會kā韓國瑜拍phok-á喝讚!  

 無疑誤第二工韓國瑜煞講伊m̄是beh射日頭,反講伊若是市長作無好,「市民罵我,我tio̍h kā家己對千千砰掉!」  

 He是另外一個故事。古早有一個人名叫作周處,足有氣力,四界拍獵,靠勢伊力頭飽,非非摻作、無人有伊法,人看伊來tio̍h緊閃。有一遍伊問一位老大人,年冬bē bái、農作物豐收,是按怎老百姓憂頭結面、無快樂咧?老大人講,咱chia有三項害人的若無除掉,老百姓無可能快樂。伊問講叼三項?老大人講:南山的白額虎、長橋的蛟龍、kah你本人鬥作夥三項。周處講既然按呢,我有法度去kā除掉。伊去山裡拍死白額虎、chhàng入去水底刣死蛟龍,伊本人改過自新拍拚讀冊無koh做歹。韓國瑜若是市長作無好,猶原會使先去kā日頭射射落來,而後才來砰掉家己、改過自新重新作人。比古早的周處加除掉幾若項害人的,相信有真濟人會kā韓國瑜拍phok-á喝讚!
Last Updated ( Friday, 22 February 2019 )
 
< Prev   Next >