首頁 arrow 綠色短評 arrow 「一中各表」,taⁿ是beh按怎koh各表落去咧!

「一中各表」,taⁿ是beh按怎koh各表落去咧! PDF Print E-mail
Written by 李南衡   
Wednesday, 06 March 2019

咱一再講根本都無「九二共識」chit號物件,若有,是「九二無共識」。悲哀的是中國國民黨一直堅持講有「九二共識」,而且是「一中各表」。

In講「九二共識」的意涵是兩旁攏承認一個中國,各人的表意無仝,in hit旁講一個中國是中華人民共和國;咱chit旁講一個中國是中華民國。無的物件講作有都已經真好笑ah,加一句「一中各表」koh khah好笑!現此時的中國國民黨主席吳敦義bat公開講,佇中國大陸bē使講「一中各表」,按呢敢無好笑?那像講我是一個查埔人,若是干單會使佇台灣講,佇中國大陸tio̍h bē使講「我是一個查埔人」。真正是豈有此理!佇中國大陸bē使講「一中各表」,假那是講干單會tàng佇台灣講罔騙台灣人?其實mā騙了無完全。任何中國國民黨的人,無管伊作過總統抑是作迥咱政府的啥物大官,無kah一個敢佇來台灣的中國鼻屎大的官員面前,講咱chia是「中華民國」!M-nā無人敢用嘴向中國人「一中各表」,koh khah m̄敢用行動,甚至禁止人民用行動來「一中各表」,上嚴重的例是,2008年十一月,中國海協會會長陳雲林來台灣訪問的時,警察沒收群眾手裡夯的國旗、驚hō͘陳雲林看tio̍h,卻出在in中國的五星旗佇台北街仔路揚揚飛。明明是「一中各表」m̄敢表!   

上bē見笑的是bat作過總統的馬英九,2015年十一月佇新加坡kah中國領導人習近平會面的時,佇全世界各大媒體的面頭前攏無人聽tio̍h,轉來台灣了後才講,伊佇習近平的面前確實有講「中華民國憲法」kah「一中各表」。  

 今年正月初二,中國國家主席習近平發表《告台灣同胞書》,伊所堅持的「九二共識」是推動兩岸雙方佇一個中國原則基礎上達成「海峽兩岸同屬一個中國,共同努力謀求國家統一」的「九二共識」。伊講「和平統一、一國兩制」是實現國家統一上好的方式。正月初二下晡,蔡英文總統隨時發表談話講:阮自了m̄-bat接受「九二共識」,根本的原因是北京當局所定義的「九二共識」,其實tio̍h是「一個中國」、「一國兩制」。…我beh koh再講清楚,台灣絶對bē接受「一國兩制」,絶大多數台灣民意mā是堅決反對「一國兩制」,che mā是「台灣共識」。

二月二四,中國國台辦前副主任王在希講,正月初二,中國國家主席習近平的講話,kā「九二共識」做了一個新的明確的解說。Chiah濟年來(中國)國民黨一直kā「九二共識」解說作「一中各表」,che是扭曲了「九二共識」原本的意義,干單認同「一中」,無謀求統一,tio̍h m̄是真正的「九二共識」。   

咱那像有聽tio̍h人teh搧中國國民黨幾粒日頭的嘴phóe,搧kah phia̍k-phia̍k叫的聲。「一中各表」,taⁿ是beh按怎koh各表落去咧! 
Last Updated ( Wednesday, 06 March 2019 )
 
< Prev   Next >