首頁 arrow 綠色短評 arrow 台灣人hō͘民進黨koh一遍的機會!

台灣人hō͘民進黨koh一遍的機會! PDF Print E-mail
Written by 李南衡   
Wednesday, 20 March 2019

三月十六,新北市第三選區(三重埔)、彰化第一選區、台南市第二選區kah金門等四個所在立法委員補選。選前中國國民黨靠勢「韓流」,講大聲beh四席攏嬴;2018年九合一大選,民進黨輸kah破膽,那像前行政院長賴清德講的:民進黨干單chhun一口氣(khùiniā-niā,請鄉親幫忙hō͘活。

講tio̍h大選,輸嬴攏會講是大環境,意思是執政的中央,總統kah行政院的執政好bái。台灣人普遍對蔡英文總統上不滿的一點是:傷過軟chiáⁿ。今年正月初二早起,中國國家主席習近平發表「告台灣同胞書」,講「九二共識」tioh是一個中國,tioh是一國兩制。Hit\下晡蔡英文總統隨時kā彈倒轉去,害中國hit旁幾若工攏無聲,in完全無想tio̍h蔡英文總統會chiah呢強!台灣人大聲喝「讚」,伊的人氣隨時chhèng縣,有人笑講蔡英文總統khioh tio̍h銃!行政院長蘇貞昌就任以來逐工衝衝衝,拚勢kā人民的怨氣一項一項解決掉十幾項。   

Chit遍立法委員補選,民進黨頂頂下下的大細粒黨官、行政首長,逐個皮攏peⁿ真ân,台南彰化三重埔走透透,拚命teh助選,無人teh分派系,咱看tio̍h民進黨未曾有的大團結。特別是前行政院長透早陪候選人郭國文四界giú票,穿兩moa佇路口、腳跋leh跋leh陪候選人teh giú票。台南人謳咾講伊家己選立委、選市長的時mā無chiah拚,人講台南是清流對削韓流,當然mā會嬴。   

韓流是啥物?m̄是指韓國瑜一下來會紋出一陣人tòe伊行。「韓流」是講白賊、做假,hông掠tio̍h包,才講m̄是按呢。上好笑的是台南第二選區中國國民黨立委候選人謝龍介,選舉前幾工才去舞一齣「韓流」大戲:chhōe一個種柚仔的農民,講舊年中國無來買麻豆文旦,致使有人kā兩百萬斤的麻豆文旦倒佇曾文溪,而且歹年冬政府mā補償阮的損失。麻豆種柚仔的農民piak孔講,hit-ê姓陳的農民是隔壁庄下營的人,無人bat看過有人kā兩百萬斤的麻豆文旦tàn掉佇曾文溪抑是溪岸。兩工後,hit-ê姓陳的農民才講,兩百萬斤是形容詞,意思是真濟。另外農委會mā聲明,所有的農產品歉收,若有申請補償查實了後攏有發補償金,經過查證chit位農民有申請mā有發補償金,而且有伊本人簽收的證據。原來che tio̍h是「韓流」,原來「韓流」m̄是the̍h去叼位攏會通。三重埔立委補選候選人、民進黨余天當選,佇競選總部向鄉親說謝的時mā講,聽tio̍h韓流來,害我驚kah siàm尿,好佳哉有咱三重埔鄉親溫暖的心,暖流kā韓擋掉,咱才選嬴。   

Chit遍立委補選,民進黨會tàng守tiâu原本有的兩席,是台灣人疼惜民進黨,hō͘民進黨koh一遍的機會,民進黨政府tio̍h加倍拚落去!
 
< Prev   Next >