首頁 arrow 綠色短評 arrow 是胡言亂語,m7是作文能力退步!

是胡言亂語,m7是作文能力退步! PDF Print E-mail
Friday, 19 June 2009
        頂日新聞報導台北市小學六年學生「國文檢測」結果出爐,講小學六年學生作文能力普遍退步。舉例講,有人寫出:「媽媽親像查某鬼,愛烏白喝咻」;去旅遊講一個所在真美,那像是「極樂世界」;問外媽將來beh做啥物?講beh做家庭主婦等等。報導講hou7真濟改考卷e5老師beh哭無目屎、beh笑無路來。只好講小六學生e5作文能力有需要加強。

        Che敢是作文能力好bai2 e5問題?m7是!che是囝仔人烏白亂講話。台灣e5囝仔人是按怎會按呢胡言亂語?照咱台灣俗語話所講「有樣看樣,無樣家己想。」囝仔人e5言行舉止,大部分是ui3大人學來e5

  假使一個小學六年學生作文,寫講爸爸歇睏日載in歸家伙去宜蘭thit-tho5,轉來e5時佇北宜高速公路頂面塞車,一塞幾點鐘be7振無be7動,hou7伊有一種「幸福e5感覺!」你看tioh8 chit種作文,你若罵講小學生e5作文程度退步就m7-tiioh8囉!因為前無偌久,五日節國道五號北宜高速公路大塞車,塞二十公里長,害一大推人哀父叫母,偏偏交通部路政司長祁文中講:「塞車ma7是一種幸福,」因為he代表台灣經濟teh成長。你無可能講祁司長作文能力有需要加強,你會講伊「胡言亂語」。

  假使一個小學六年學生作文,講我beh改掉早前所有e5歹行為。無beh及同學冤家相拍,無beh隨便tan3垃圾仔佇土腳,考試無beh作弊。後壁加一句講:無beh作弊並m7是講無beh偷看別人e5考卷。你be7使講chit -e5學生囝仔作文能力退步,伊是胡言亂語。會記得一冬前競選總統e5時,馬英九講伊主張:不統不獨不武。今仔日馬英九講,不統並m7是排除統一chit-e5選項。Che那是馬英九作文能力退步?是伊胡言亂語!

  假使一個小學六年學生作文,講伊拍學校糾察隊同學,完全是因為疼惜hit個糾察隊同學。老師看tioh8 chite5文字,當然be7想講chit-e5學生e5作文能力退步,ma7知影che及作文能力完全無關係。所以,老師真有可能會摸chit-e5小學生e5額頭看伊有發燒無?若無那會胡言亂語到chit款?原來伊是學馬英九總統,到chit陣馬英九總統猶teh告早前ka7伊起訴hit-e5檢察官候寛仁,馬英九講伊ka7告是「抱tioh悲天憫人e5心情。」

  新聞報導作文能力退步hit幾位小學生,事實上m7是作文能力退步,是胡言亂語。in將來會做啥物大事業咱m7知,咱知in現此時有資格做大官,至少會tang3做交通部路政司長,koh khah胡言亂語,ma7有可能做總統。
 
< Prev   Next >