首頁 arrow 綠色短評 arrow 民進黨總統初選,是會團結抑是會分裂?

民進黨總統初選,是會團結抑是會分裂? PDF Print E-mail
Written by 李南衡   
Wednesday, 27 March 2019

三月十八,行政院前院長賴清德無預警,去領表登記民進黨總統初選,有人解讀作向蔡英文總統「逼宮」。賴清德接受訪問的時表示,che是責任的承擔,民進黨是民主政黨,經由民主程序來進行一場超越個人、派系,完全為台灣的君子之爭,tio̍h 有分裂的危機。透過民主程序koh khahtàng hō͘民進黨團結。

總統府秘書長陳菊表達憂心,認為tī chit-ê關鍵的時刻,逐個應該坐落來充分討論、對話;行政院長蘇貞昌,希望最後代誌會tàng有轉(tńg)倒,而且呼籲「團結,做夥拍拚,hō͘國家繼續向前行!」基隆市長林右昌講:「Chit-má是民進黨上lám-身的時陣,團結都無一定會贏,若是無團結,一定輸!我真煩惱!」新竹市長林智堅對賴清德登記民進黨總統初選感覺意外,伊呼籲黨內高層tio̍h坐落來好好談談一下,逐個一定tio̍h團結;桃園市長鄭文燦講原本in攏有表態thīn總統蔡英文,chit-má賴清德投入,hō͘ in新潮流系內部相當為難。  

 連長期kah賴清德做夥拍拚的少壯派地方首長都會煩惱分裂,何況一般人。但是,民進黨有一套完整的初選機制,若是有兩個以上爭取黨內總統提名,以chit遍總統初選來講,三月廿二登記截止,三月廿三日至四月二日進行協調(因為蔡總統出國訪問,順延一禮拜)。民進黨中央已經有成立五人協調小組,除了黨主席,猶有立法院黨團總召柯建銘、桃園市長鄭文燦、總統府秘書長陳菊以及行政院推派的人選,參詳了tio̍h經中常會通過才確定。協調若無成,tio̍h進入民調。民進黨主席卓榮泰有提出四項要求︰第一,黨的負責人一定中立、公正;第二,要求黨務主管絕對中立,選務絕對公平;第三,要求黨公職tī登記了、結果猶未出爐進前,mài過度表態;第四,拜託所有支持者tī結果出爐前,m̄-thang對另外一旁傷過情緒化。卓主席講,以賴清德kah蔡英文的高度、能力、脾氣、過去合作關係,bē刣kah流血流滴,伊mā有責任防止chit號代誌發生。卓主席呼籲,黨內同志合意叼一位無要緊,但是請全體黨公職人員mài過度表態。  

 三月十九早起,立法委員陳明文chhōa二十幾位立法委員佇立法院門口表態, 手the̍h「團結拚勝選 」、「堅持挺小英」、「合作顧台灣」的牌仔,陳明文代表發言講,「徛佇chia是代表基層的憂心,支持蔡英文才會tàng保黨,才會tàng守護台灣。」根本亂講!是按怎選賴清德tio̍h bē tang保黨、守護台灣?若是按呢,是m̄是民進黨的初選辦法tio̍h廢掉,改作:若有現任的縣市長、總統尋求連任的時,bē使有人挑戰。陳明文hit陣人正是破壞民主、破壞團結的人!  

 民進黨總統初選,成群結黨會破壞團結,君子之爭顚倒會hō͘民進黨大團結!
 
< Prev   Next >