首頁 arrow 綠色短評 arrow 雙腳踏雙船,心頭亂紛紛!

雙腳踏雙船,心頭亂紛紛! PDF Print E-mail
Written by 李南衡   
Wednesday, 17 April 2019
 四月初八新聞報導,有一位原本tòa佇美國的法學專家邵子平,有the̍h tio̍h中國身分證,致使hō͘咱台灣政府伊的戶籍註銷掉。

邵子平質疑咱國政府「違憲」,beh對內政部移民署kah相關官員提出行政訴訟。根據香港《明報》的報導,今年八十二歲的邵子平是中華民國外交官邵毓麟的後生,2003年起佇北京定居。舊年十月伊有chhōe tio̍h美國牧師約翰.馬吉當年偷偷翕的,記錄南京大屠殺暴行的「馬吉影片」,伊kā史料送hō͘南京大屠殺紀念館保存。南京市感念邵子平的行為,舊年十二月特別批准伊the̍h當地戶籍。

三月初四,咱國內政部移民署發出公文hō͘「台北市萬華區戶政事務所」講,「邵子平先生目前已經the̍h tio̍h大陸地區人民身分證,本署根據『廢止台灣地區人民身分kah戶籍作業要點』第四點規定,通報貴所廢止邵先生佇台灣地區的戶籍。邵子平認為,咱國政府取消他的戶籍十分嚴重損害tio̍h伊的經濟利益kah踐踏(thún-ta̍h)伊的政治權利,伊講:「我有台灣戶籍幾十年ah,註銷掉我佇台灣的戶籍,我的健保kah退休金攏bē-tàng領,上重要的是,我依法應該享受的選舉權、罷免權等政治權益攏無去ah。」四月初八,移民署回應講註銷伊的戶籍完全符合規定,若想beh恢復台灣戶籍tio̍h愛先註銷中國戶籍。   

聽講邵子平beh作中國人又koh想beh享受台灣健保,四月初九,行政院長蘇貞昌霸氣唱聲:「門都沒有!」(台灣話的意思是講:想to̍h免想!)仝一日,陸委會主任委員陳明通親身留話回應,表示邵子平干單註銷中國戶籍,tio̍h會tàng恢復台灣地區人民的身分。   

上好笑的是四月初十,記者問中國國台辦發言人馬曉光,對邵子平因為有領中國身分證煞hō͘台灣官方註銷戶籍chit項代誌的看法。馬講,in有注意tio̍h相關的報導,伊講近年來兩岸人民交流往來愈來愈密切,伊指責台灣執政黨「m̄-nā抱殘守缺(意思是講保守bē曉改進),而且變本加厲(意思是講愈來愈嚴重)」,一直teh設置障礙,佇牽涉tio̍h兩岸人民利益之間「挖坑溝、起懸牆、斷人路」,嚴重傷害tio̍h台灣民眾的利益。已經入籍中國的台灣人,無法度繼續享受台灣人的權利,中國政府免大細聲,應該khah有氣魄一絲仔講:來,祖國攏補恁!   

親像邵子平chit款人,到今年二月底為止,已經有七百七十人hō͘咱政府kā in的戶籍註銷掉,邵子平m̄是頭一個、mā m̄是上尾的,免佇hia哭孱(khàu-chhan),雙腳踏雙船的人,心頭原本tio̍h會亂紛紛,siáng叫你!  
Last Updated ( Wednesday, 17 April 2019 )
 
< Prev   Next >