首頁 arrow 綠色短評 arrow 金大中確實是勇e5!

金大中確實是勇e5! PDF Print E-mail
Written by 李南衡   
Friday, 26 June 2009
        一九五0年北韓南侵e5時,金大中佇故鄉hou7北韓軍掠去關等待處決,好佳哉聯軍ui3仁川登陸,ka7北韓軍拍倒轉去、伊才無死。五四年開始參與反對李承晚運動,一九六一年成作南韓反對派e5頭人之一,七一年挑戰朴正熙參選總統,朴正熙選贏煞ka7金大中掠起來、講伊「危害國家安全」,禁止伊參政。而後金大中流亡去日本,因為一直有想beh選總統,七三年八月初八,韓國中央情報局派人去ka7劫轉去南韓。八0年全斗煥將軍政變成功奪權,宣佈金大中叛國ka7判死刑,因為美國出面挽救,才改判二十年有期徒刑,koh ka7趕出去美國流亡。八五年轉去南韓,八七年及好朋友金泳三相拼,總統大選雙雙落選。九二年金泳三當選總統,後一屆九七年金大中第四遍參選才當選總統。

        今年六月十一,金大中講:m7 thang向獨裁者le5頭、ma7 m7 thang扶挺獨裁者。獨裁政權再次佇chit片土地頂頭誕生,貧富差距惡化到歷史上差e5水準,咱所有e5人攏應該行動起來,守護自由、平民經濟,及南北關係。

  若ka7最後一句改作:「及台灣中國關係。」完全適用佇今仔日e5台灣。

  金大中koh講:我是用拼死e5心情講chiah-e5話。若是無行動,就是徛佇邪惡e5 hit旁。

  金大中講:我確信,若是照現此時按呢行落去,國民、政府,攏會變成不幸,希望李明博總統做出決斷。

  若ka7李明博三字改作馬英九,ma7足合咱台灣。

  金大中對盧武鉉有真深刻e5瞭解,伊講:阮攏是讀商業學校高職部,因為無錢thang讀大學。我是因為對李承晚政權感覺氣憤,盧武鉉是因為對朴正熙政權感覺憤慨,才放棄本業,投身佇政壇。

  金大中講,佇盧武鉉上界痛苦e5時陣,假使若有伊死了去送葬一成e5人,也就是若有五十萬人主張講:「佇無確實e5證據情形下,be7使hou7前任總統造成精神上e5打擊、及hou7伊受tioh8恥辱。」按呢盧武鉉tioh8 be7死。

  台灣敢無可能集五十萬人徛出來,為阿扁前總統講仝款e5話?

  金大中確實是勇e5。勇e5就是m7chem7he,敢講出良心話e5人。咱台灣敢有一位小可及金大中會tang2比並e5人,敢對施政khah輸李明博e5馬英九唱聲?阿扁前總統hong5烏白關兩百外工、中國國民黨按呢凌遲、按呢侮辱阿扁前總統,敢有to2一位有頭有面e5人敢徛出來講一兩句良心話?

  無。一個都無。Che是台灣人e5悲哀!

Last Updated ( Friday, 26 June 2009 )
 
< Prev   Next >