首頁 arrow 綠色短評 arrow 恐怖分子,隨時kā趕出去!

恐怖分子,隨時kā趕出去! PDF Print E-mail
Written by 李南衡   
Wednesday, 24 April 2019

 中國統一和平促進會(台灣分會)主辦,原本預定四月十三舉行的「2019年第一屆『和平統一融合發展論壇』」,會前有「支持九二共識、宣揚和平、支持統一」遊行,海報特別標強調有「警車開道」,遊行三十七公里了後有論壇,本屆論壇主題是:維護和平統一前景,探索一國兩制台灣方案。主講者是旅美社會學家李毅教授。免看海報頂面有一張大張習近平的相片,看論壇題目知影是為宣傳今年正月初二,中國國家主席習近平所講的「一國兩制台灣方案」作宣傳。經過幾工新聞媒體一再指責,是按怎中國按呢侵門踏戶,台中市警察局tio̍h koh派警察車 in遊行隊伍「開道」,實在是水淹到鼻ah,無法度koh忍落去ah。有關單位才驚一下發現演講者李毅教授是一個足出名的「武統」主張者。

咱政府隨時以李毅來台灣觀光簽證kah伊參加遊行演講的活動目的不符作理由,隨時廢止伊的入境許可,而且限令伊隨時出境。四月十二透早,移民署佇南投竹山的民宿chhōe tio̍h伊、kā押送到桃園機場,早起七點二五分執行強制出境的行動。行政院長蘇貞昌接受訪問的時講:佇台灣宣傳「武統」的人tio̍h是「恐怖分子」,kā趕出去,抵好niā-niā!   

蘇院長是按怎講李毅是恐怖分子?因為李毅「武力統一」台灣的講法是按呢:伊強調ùi統一的角度來看,台灣「愈亂愈散愈好」,政治愈亂,經濟愈差人民愈散,對統一愈好,台灣已經行來到chit個方向,「只要咱一下kā拍,美國無來救,馬上tio̍h會使統一ah!」伊hông趕轉到香港的時,猶「死鴨仔硬嘴pe」講,「相信設使韓國瑜若當選(總統),我tio̍h有機會koh去台灣。」四月十五,中國chit-ê「武統」學者李毅佇中國接受訪問的時講,若是韓國瑜選tio̍h台灣領導人,伊真緊tio̍h會tàng koh去台灣;韓國瑜執政了後,「(中國政府)會使講隨心所欲,想beh按怎tio̍h會tàng按怎,想beh武統tio̍h kā武統,北京想beh用啥物方式tio̍h用啥物方式。」你聽tio̍h敢bē驚?   

中國已經安排好四月底有中國學者beh來台灣宣講武力統一台灣,四月十六,蔡英文總統指示:拒絕鼓吹「武統」、「一國兩制」的人入來台灣。陸委會表示會嚴格顧守,禁止chiah-ê學者入境。行政院長蘇貞昌表示,台灣是一個自由民主開放的國家,歡迎各國人士來看台灣好山好水,體會台灣人的善良、好客,但是若beh來台灣宣傳武力統一,che tio̍h非常無應該、無友善,chit種人m̄-nā嚴格禁止,萬不幸「設使有人入境ah、tio̍h隨時kā趕出去!」   

讚!恐怖分子,隨時kā趕出去! 
 
< Prev   Next >