首頁 arrow 綠色短評 arrow 期待台灣的新聞記者有啥款的風骨?

期待台灣的新聞記者有啥款的風骨? PDF Print E-mail
Written by 李南衡   
Monday, 29 April 2019

 最近半年khah加,美國拚勢警告伊的盟國,有關華為設備暗中有藏tio̍h資訊安全的風險,事實上有引起各國電信業相續拒絕使用華為設備,上厲害的是一月底以違反對伊朗制裁、詐欺、kahthe̍h技術等二十三項罪名刑事起訴華為,hō͘伊佇西方國家四界碰(pōng)壁

華為的回應是開大把錢作公關戰,第一步是二月二八佇《華盛頓郵報》、《紐約時報》、《華爾街日報》、《今日美國報》、《洛杉磯時報》kah《政治活動家“Politico”》等各大媒體買全版廣告,佇廣告中指出華為大門永遠是開的,講美國政府有誤解華為,呼籲讀者m̄-thang相信「你所聽tio̍h的一切」。第二步是邀請美國媒體記者參觀華為園區,希望會tàng hō͘美國大眾koh khah了解華為。  

 三月初一,《華盛頓郵報》記者羅真(Josh Rogin)佇“Twitter”寫文,koh kā伊收tio̍h的電子郵件登出來。主要是講伊有受邀請tī三月十八hit禮拜,去參觀訪問華為佇深圳的總部園區,會tàng參觀產品線、實驗室,koh會tàng kah華為幾位高層進行「私下談話」,加減談一寡華為佇美國的困境。華為願意kā chit chōa參訪的食、tòa kah機票開銷攏總包落來。批koh有附註重點提醒「本次參訪名額有限,佇阮名單最後確定進前,請你mài kah別人討論」。羅真表示,會接受邀請的記者會hông看無起,in家己mā應該感覺見笑才tio̍h。伊講伊按呢回批講:「感謝邀請,但是m̄-nā本報社的政策禁止,而且我本人的道德觀mā bē tàng接受幾千美金的大禮,特別是ùi一間幫忙外國情報機構工作的企業。」   

駐在過中國真濟年的《紐約時報》記者傅才德(Mike Forsythe)轉貼羅真的“Twitter”指出:「真正怪ah,我m̄知影有叼一間信譽優良的美國媒體會允准家己的記者接受企業chiah呢貴的旅行招待。華為應該mā知影才tio̍h。」  

 Che是美國新聞記者的風骨-無受利益誘惑,堅強不屈的氣慨!   

新聞報導講,中國佇全世界新聞自由排佇尾溜算倒轉來第五名,但是伊佇全世界各國收買當地的記者,來影響各國的新聞內容。Hō͘咱想起2018年十二月有周刊piak孔,傅崐萁tī擔任花蓮縣長任內,攏總有發包二十五個縣政府媒體採購案,得標者攏總是花蓮在地媒體記者,每一個承包標案的記者tī七個月內有the̍h tio̍h十四萬至四十六萬不等的酬勞。悲哀的是,所有khah有名的報紙kah電視台的新聞記者,差不多攏著吊(tio̍h-tiàu)。Chit種行為等於是chiah-ê新聞記者hō͘花蓮縣政府teh包飼。你想,中國敢bē來台灣收買記者?   

咱期待台灣的新聞記者有啥款的風骨? 
 
< Prev   Next >