首頁 arrow 綠色短評 arrow 溫暖e5黃絲仔帶

溫暖e5黃絲仔帶 PDF 列印 E-mail
發表者 李南衡   
2009/07/03, Friday

 

六月二十,美國東部及西部台僑發動一個「阿扁加油,台灣加油」結黃絲仔帶活動,ma7發表聲明表達對台灣政局e5憂心。In講阿扁「一再受屈辱食苦」,那像家己hong5侮辱、家已teh食苦。抗議阿扁hong5關兩百工,向望阿扁會tang3早一日得tioh8釋放、轉去厝裡團圓。In對馬政府「無管國內外理性善意e5呼籲,繼續追殺政敵,拆裂台灣」,用結黃絲仔帶表達上沉痛e5無言抗議。

 

台灣國家聯盟總召集人姚嘉文、台獨聯盟主席黃昭堂、台教會會長陳儀深等社團代表,會同民進黨黨團書記長高志鵬召開記者會,共同宣布發起結黃絲仔帶行動。為抗議扁案等司法案件審判不公,七月初九發起「堅持公平審判,全民捍衛人權-全民結黃絲仔帶」活動,呼籲民眾ti7七月十二下晡兩點,佇全台灣各縣市政府、司法機關、抑是鬧熱所在結黃絲仔帶,要求馬政府隨時停止變弄司法。社團代表ui3七月初九開始結黃絲仔帶。台北市規劃七月十二下晡兩點開始,ui3台北看守所一直到台北市二二八公園沿路攏beh結黃絲仔帶,hit暗佇二二八公園舉辦黃絲仔帶祈福晚會。

咱攏知,日本政府殖民統治台灣e5時,對任何嫌犯拘留be7使超過一個月,所以hit當時e5人攏知影「拘留二九工」chit句話。中國國民黨政府無必要一直ka7阿扁前總統拘留到二百九十工,來證明in chit-e5殖民統治政府,比日本政府hit-e5殖民統治者au3十倍、垃圾十倍、可惡十倍。Ka7阿扁前總統拘留超過二九工,咱就知影中國國民黨殖民政府比日本殖民政府koh khah差!

黃絲仔帶e5由來是按呢:一九七一年,美國有一個查甫人刑期滿了出獄,坐巴士beh轉去厝裡e5途中佇車頂講出伊e5心境。伊teh beh出獄進前有寫一張批hou7e5牽手。批寫講,若beh原諒我,請佇咱厝前hit欉老樹頂面結一條黃絲仔帶,我看tioh8就會落車轉厝。假使我若無看tioh8黃絲仔帶,表示你無beh原諒我,我無怨歎,我會繼續坐巴士離開故鄉。「Teh beh到厝ah!我實在緊張kah m7敢看。若看tioh8黃絲仔帶就代表我會tang3轉去厝裡,黃絲仔帶才是真正hou7我得tioh8自由e5鎖匙。司機ah,拜託你替我看。」歸車e5旅客攏替伊大歡喜!m7是一條,是歸百條e5黃絲仔帶結佇hit欉老樹頂面。

聲援阿扁前總統e5人無人講伊有罪抑是無罪。In e5想法真單純:伊若有罪,ka7起訴、ka7判罪、hou7伊去坐監;伊若無罪就緊ka7放。TaNchitau3步掠人關人,無gau5啦!咱結黃絲仔帶m7但是抗議烏白拘留人,koh khahbeh送溫暖hou7阿扁仔前總統:阮歡迎你轉來!

 
< 前一個   下一個 >