首頁 arrow 綠色短評 arrow 草包那會愈來愈草包?

草包那會愈來愈草包? PDF Print E-mail
Written by 李南衡   
Wednesday, 29 May 2019

  五月十四,高雄市長韓國瑜市政會議徙到高雄市立美術館,會議了,伊帶領市府各局處首長做夥佇高雄美術館看展覽,而後逐個前往大廳做夥翕相。無疑誤韓市長忽然間chhōa全體人員喝口號,伊特別強調tio̍h用「念力」hō͘高雄衝出來,伊先大聲喝「高雄!」,逐個大聲應講「發大財!」,按呢連續喝四遍,喝了後韓市長koh大聲喝一聲「爽!」咱佇電視新聞報導頂面看tio̍h包括葉匡時副市長、各局處首長攏kah韓國瑜市長仝款,笑hai-haikah真大聲。看起來是攏真「爽」的款式!

有一位網友真受氣講:「下晡我抵抵chhōa學生佇高雄美術館參觀,我嚴格要求學生囝仔tio̍h愛安靜,準若beh.講話mā-tio̍h輕聲細說,結果是看tio̍h高雄市的大家長韓國瑜市長chhōa頭佇高雄美術館內底大聲嘻嘩,有夠無款!作老師的是beh按怎教育下一代咧?   

有真濟網友佇高雄美術館的面冊粉絲專頁留話,要求館方正視chit-ê問題,甚至搬出前館長謝佩霓的事蹟來做對比講,「過去謝館長會kā高雄美術館四箍圍人行道的競選布條拆落來,才koh親身送還競選人服務處。咱看現任李館長,m̄-nā無kā韓國瑜市長阻止大聲嘻嘩,koh kah in做夥佇館內大聲喝「高雄發大財」,高雄過去累積起來的人文景觀已經慢慢褪色去。」   

Khah hō͘咱感覺意外的是,Hit工在場的葉匡時副市長,bat作過交通部部長;李四川副市長,bat作過中國國民黨秘書長、行政院秘書長、新北市政府副市長;教育局長吳榕峯、社會局長謝琍琍、文化局長王文翠、新聞局長王淺秋等等等等,真正無一個人知影美術館保持安靜是常識嗎?是按怎chit-ê韓市長kah眾局處長一陣人,會做出那像「中國大媽」旅行團hông hàiⁿ頭的行為咧!敢bē使小可khah有文化素養kah文化水準一絲仔?網路頂面罵聲無斷,五月十五早起,韓國瑜市長才趕緊出來會失禮。   

咱感覺khah遺憾的是,高雄市政府文武百宫,看韓市長講出無適當的話、做出脫線的行為,無論是為tio̍h韓國瑜市長本人、為tio̍h高雄市政府的形象、抑是為tio̍h高雄市的名聲kah將來,那會無一個官員tī代誌發生的時、抑是事後,細聲kā韓市長提醒講:按呢講m̄好、按呢做無適當。無,無半個敢出聲。真有可能是副市長抑是局處首長為tio̍h個人的官位、抑是可能驚惹起韓市長旳無歡喜甚至受氣,所以才會恬恬無出聲。   

按呢咱tio̍h知,是按怎獨裁者會愈來愈獨裁,草包會愈來愈草包!
 
< Prev   Next >