首頁 arrow 綠色短評 arrow 高雄模範生,m̄是假的!

高雄模範生,m̄是假的! PDF Print E-mail
Written by 李南衡   
Wednesday, 03 July 2019

六月底,各級學校攏teh無閒學生的畢業,高雄市長韓國瑜無閒kah逐間學校得「市長獎」的以及模範生作夥翕相。六月十九,得tio̍h「市長獎」的以及模範生一個一個上台,韓國瑜市長伸出正手,請學生看頭前,兩個作夥用大拇公比讚,翕相了韓市長摸學生的頭。有一位中山國中姓吳的模範生當面韓市長講:你beh選總統chit件代誌實在太好笑!韓市長緊用左手kā póe伊離開。有記者問chit位學生那會按呢對市長講話?學生應講,希望市長的感性m̄-thang壓過理性,韓市長tio̍h醒起來。各種新聞媒體報導了,韓市長謳咾講,chit名學生才國三niā-niā tio̍h家己內心的意見表達出來,按呢誠好應該伊尊重。

咱台灣俗語話講:「有樣看樣,無樣家己想。」果然無錯!   

六月二一,鳳山工商姓黃的畢業生穿一領白衫頂面有寫「溜之大吉」四大字。因為去年十月初九,韓國瑜當teh競選高雄市長的時,有接受網紅「館長直播」訪問,答應伊bē作「落跑」市長,無半年講beh參加中國國民黨總統初選。館長罵韓國瑜無講信用。黃同學講:高雄人攏teh注目看市長,市長卻teh注目看總統府!伊講,除了韓市長有問題,手the̍h選票的大人mā有責任。無尊重手中的選票,tio̍h免期待選出來的市長會尊重你!   

六月二四,韓國瑜市長參加第四場合影活動,一位高雄中學模範生the̍h一本冊kah韓國瑜市長翕相,相翕落去才hông看出冊名《為啥物愛講白賊》,用冊名來表達伊的心意,相翕了冊囥落去伊的冊包離開,無愛接受媒體訪問。   

三個查埔學生表達心聲了後,有教育專家分析講,有可能是一般台灣人認為政治是查埔人的代誌,查某人上好是mài插。話to̍h講猶未煞,六月二五下晡上尾場佇新莊高中舉行,仁武高中姓陳的女畢業生,佇伊的獎狀後面貼兩張紙條,翕相的時才展開,一旁寫「做好」、一旁寫「做滿」,韓市長請伊收起來,講:Che有小可敏感。中華藝校姓李的女畢業生佇翕相的時the̍h出一幅字,頂面寫「做好做滿愛高雄」,韓市長看了謳咾,請伊先收起來翕相;中華藝校姓陳的女畢業生the̍h出登革熱(咱台灣人早前叫作天狗熱)防治文宣「蚊防四寶」,請韓市長kā防疫工作做好。女同學無輸男同學。   

高雄chiah-ê得「市長獎」的以及模範生的表現,有人用童話故事〈國王的新衫〉來形容in是天真的囝仔,kah愛面子的大人無仝款,敢老實講國王無穿衫。其實in猶有一點值得謳咾的是,in表達心意的方式真特別,超過大人。   

高雄模範生真正有夠讚,m̄是假的! 
 
< Prev   Next >