首頁 arrow 綠色短評 arrow 高雄溫州小三通,攏是假的攏是騙!

高雄溫州小三通,攏是假的攏是騙! PDF Print E-mail
Written by 李南衡   
Wednesday, 10 July 2019

  六月二五,由上和海運公司kah中國夢促進會佇高雄碼頭邊,盛大舉行「高雄旗津-溫州洞頭小三通首航典禮」,經過報導了後,hit下晡,第一個跳出來講話的是行政院陸委會,陸委會講小三通是中央的職權,中央無批准beh那有啥物小三通咧!何況高雄旗津根本to̍h m̄是政府畫定的小三通港口。陸委會講,主辦chit遍小三通首航活動的「上和海運股份有限公司」是無的、是假的,該公司船舶運送業許可證 2019年一月二五tio̍h hō͘交通部航港局註銷掉去ah,而且該公司已經 2019 年六月十二日解散去ah,那有hit號公司?陸委會直接批判che是一場政治操作的騙局,想beh營造一個「發大財」的假象,koh khah是藐視國家主權、teh挑戰中央政府佇兩岸事務的權責。

另外,內政部去查另外一個主辦單位「中國夢促進會」,是tī民國103年(2014)申請登記,民國104年(2015)經核准成立了後,卻攏m̄-bat函報會務資料hō͘內政部,ma m̄-bat提交任何財報,內政部已經發文要求該會說明組織kah活動內容,而且提供財報kah koh khah濟相關的資料。    

參與首航活動的「永順二號」有bat走私的歹紀錄,預報 2019年七月三十一出港,下一個港口是金門;另外一台「延鴻」輪預報2019年十二月三十一出港,下一個港口是烏坵。按呢算啥物「小三通」?兩船目前攏佇高雄港內,mā攏猶未向交通部航港局提出「小三通」抑是直航申請。  

第一時間,行政院蘇貞昌院長tio̍h認定che是一場的騙局,一級主管竟然出席剪綵、致詞、合照koh貼上網,蘇院長要求高雄市府應該督管一級主管的言行。  

副市長葉匡時那像有淡薄無teh kā「信到」,伊語氣小可激動講,請蘇院查清楚,是按怎港務公司beh准chit間詐欺公司佇港務公司二一號碼頭辦詐欺活動咧!Bat作過交通部長的葉匡時知影港務局是屬中央管的,伊卻m̄知,邀請批是寫活動佇碼頭,hit工臨時改佇碼頭邊的星光公園舉行,主辦者並無向公園管理單位抑是工務局申請。葉副市長敢是作假的。    

有「韓粉」擔心觀光局長烏白去剪綵、致詞,會拍歹韓國瑜市長的名聲,要求觀光局長潘恒旭tio̍h辭職,潘局長講,會叫我辭職的攏是「假韓粉」。奇怪,那有hiah濟「假韓粉」?M̄-nā「韓粉」有假的,你注意看,chit遍高雄溫州小三通歸齣戲攏是假的。Ùi頭騙到尾!    

中國臭彈,beh拍台灣不如買台灣,beh買台灣不如騙台灣。In chit-má當teh買台灣兼teh騙台灣,真正省本多利!台灣人敢有影hiah好買hiah好騙?
 
< Prev   Next >