首頁 arrow 綠色短評 arrow 台灣司法敢是鼻糊e5?

台灣司法敢是鼻糊e5? PDF Print E-mail
Written by 李南衡   
Friday, 17 July 2009
        頂日有人ui3網路傳一個資料hou7我,是中國上海市閔江區蓮花河邊,一大棟十三層、差不多有八間店面闊e5大樓倒去e5相片及文字說明。Chit棟大樓是hit-e5社區新起e5十棟大樓e5一棟。已經進入最後工期,預定明年二0一0年五月及上海世界博覽會仝期交厝,聽講差不多攏賣出去ah。看tioh8倒相向e5大樓那像番仔火盒仔,無啥物地基,無鋼柱,甚至連鐵筋ma7無。有影是照報導所講e5:倒kah真整齊。

有買tioh8上海市蓮花河邊社區大樓e5人當然會驚,趕緊去chhoe7業主喝beh退錢。

有人問講,舊年四川七點八級大地動真濟校舍倒去,其中上嚴重e5是一間叫作聚源中學一棟三樓起e5教學大樓倒去,當時有九百個學生佇內底,實在真悲慘。Hit種校舍hou7人罵講是「豆腐渣工程」(換作咱台灣話來講是「豆頭起e5厝」)。Chit遍上海無地動大樓倒去,hong5罵講che倒底是啥物起e5?有人問講敢是風颱來hou7幾級e5暴風吹倒去e5?無ah,那有啥物風颱?若無那會無代無誌倒去?謠傳講因為是鼻糊e5,有人對邊仔過ka7睨一下,煞倒去。

        七月十三,台北地方法院ka7已經羈押兩百二七工e5阿扁前總統裁定第三擺延押,就是講beh繼續ui3七月二六羈押到九月二五。講阿扁前總統chhoe5司法先進討論、謗大病情、佇看守所接見已經解除委任e5律師時,要求in上電視節目、上報紙等等,透過外力聲援伊,koh beh借民進黨主席蔡英文施壓,利用連署等方式干擾審判,koh講阿扁前總統有辦護照,就是有想beh逃亡。所以有koh再羈押e5必要。辦一本護照也有代誌?少缺人及阿扁總統仝款,辦一本印有「台灣」兩字e5謢照無出國,萬一此後若有犯罪嫌疑,煞變作有逃亡e5意圖?講按呢傷ham3啦!陳松棟律師認為,審判是獨立e5,若是蔡守訓因為按呢就會hong5干擾,he是蔡守訓e5錯。何況ine5干擾審判、戕害司法,攏m7是羈押要件。陳松棟律師表示,伊實在m7知影「干擾司法」是刑事訴訟法內底e5 to2一條。陳律師講,假使被告e5行為會tang3干擾司法,按呢台灣e5司法ma7傷過lam2身。伊講:司法那會chiah呢無自信咧?敢有影be7be7磕得?

        咱會驚。台灣e5司法tang時仔變kah按呢?無地動無風颱,台灣e5司法那會無代無誌倒去?那像上海hit棟大樓倒kah真整齊,是啥人kham-嗽傷大聲?抑是是啥人ka7睨一下,台灣e5司法煞倒去!台灣司法敢是鼻糊e5  

註:「豆腐渣工程」chit句中國話,請用華語念。

Last Updated ( Friday, 17 July 2009 )
 
< Prev   Next >