首頁 arrow 綠色短評 arrow 美國賣武器hō͘咱台灣,chit-má當tio̍h時!

美國賣武器hō͘咱台灣,chit-má當tio̍h時! PDF Print E-mail
Written by 李南衡   
Thursday, 18 July 2019

 美國東部時間四月十五,美國國防安全合作署(DSCA)宣布,美國國務院批准一項可能總金額有美金五億(約新台幣154.3億)的對台軍售案,繼續提供台灣F-16戰鬥機飛行員佇美國受訓,而且用佇相關維護及kah後勤的支援。每遍美國賣武器hō͘咱台灣,中國一定氣kah phu̍t-phu̍t跳。美國東部時間五月初七,美國眾議院無異議通過「2019年台灣保證法案」kah「重新確認美國對台kah對執行台灣關係法承諾」決議案,法案要求對台軍售tio̍h常態化。中國koh跳一遍;七月初四美國知名的外交雜誌《外交政策》報導,無具名的官員指出,台灣向美國提出beh買上新型的F-16V戰鬥機,差不多新台幣3,000億,因為細節猶未講好勢,致使交易所用的時間超出預期,到taⁿ猶未定案,但是chit項軍售計畫八月國會休會進前會有新的進展。中國koh跳一遍。

 

美國東部時間七月初八,美國國防部指出,美國國務院已經批准賣hō͘台灣108台「地表上蓋強的戰車」M1A2T艾布蘭戰車(上尾字英文字“T”是“Taiwan”的意思)、250粒刺針飛彈、拖式飛彈kah標槍飛彈等四項對台軍售案,而且由國防部正式「知會國會」程序,預計一個月後生效,估計價值美金22億2,356萬(約新台幣678億1,858萬)。Chit遍中國koh大跳!七月初九下晡,中國外交部發言人耿爽佇例行記者會指出,美方賣武器hō͘台灣,嚴重違反國際法kah國際關係基本準則,嚴重違反一個中國原則kah中美三個聯合公報規定,粗暴干涉中國內政,損害中國主權kah安全利益,中方對che表示強烈不滿kah堅決反對,已經向美方提出了嚴正交涉。耿爽真bē爽、氣phu̍t-phu̍講,台灣是中國神聖領土不可分割的一部分,任何人都bē-tàng估計傷低中國政府kah人民捍衛國家主權kah領土完整,反對外來干涉的堅定決心。中國要求美國隨時撤銷對台軍售計畫,停止美台的軍事聯繫,以免對中美關係kah台海和平穩定造成進一步的損害。  

美國國務院發言人Otagusu(Morgan Ortagus)女士表示,美國對台利益,特別是kah chiah-ê軍售有關的,是為tio̍h促進兩岸kah區域的和平kah穩定,美方長期以來基於美中三個公報kah台灣關係法的「一中政策」並無改變。

咱tio̍h特別注意,in講的啥物「美中三個公報」無咱台灣的代誌,美國kah咱所講的「台灣關係法」,kah幾個中國無關係。美國認定咱tio̍h是台灣。  

 明年一月台灣beh選總統,美國一再作好球hō͘蔡英文總統拍。咱大聲謳咾,美國對咱蔡英文總統有夠讚,美國賣武器hō͘咱台灣,chit-má當tio̍h時! 
 
< Prev   Next >