首頁 arrow 綠色短評 arrow 韓粉恐怖統治下的高雄!

韓粉恐怖統治下的高雄! PDF Print E-mail
Written by 李南衡   
Tuesday, 30 July 2019

 七月初六,高雄市政府推出「高雄觀光日」,希望店家響應,打折優待觀光客。高雄「廣德家」反串推出「發大財煎餅」口號,原價七十元的芎蕉煎餅一份賣韓粉一千元,另外佇店內提供罷免韓國瑜市長連署書,若簽署罷免tio̍htàng用一元換一份香蕉煎餅。有姓楊的女韓粉去店門口罵店家「去死!」koh飆罵佇店內的一位十八歲女學生。廣德家七月十一暗發出聲明,講老闆幾日來hō͘韓粉謾罵致使精神耗弱就醫,續落去國稅局上門來稽查、厝主無愛koh 店面租hō͘伊,希望伊緊搬走。廣德家頭家講伊的個資、隱私攏hông起底,佇鹽埕區做六年的細間店仔經營落去,韓粉有整理「高雄六大不歡迎韓粉店家」,mā hông列佇內底。Hit位十八歲少女hông大細聲罵猶煞,事後韓粉koh佇網路頂面伊霸凌。一再告韓粉成功得tio̍h賠償金的名政論家王瑞德,接受少女的拜託,幫忙伊告侮辱伊的十二個韓粉,唱聲告到底!

 

 「廣德家」無店面thang經營,先佇朋友咖啡店的亭仔腳作一工的快閃生理。時代力量市議員黃捷邀請去伊的服務處賣,第三站來到民進黨市議員黃文益服務處,食餅作公益請民眾kā錢投入家扶中心的撲滿寶寶內。第四站廣德家頭家身穿「溜之大吉」的衫,佇民進黨市議員林智鴻服務處煎餅。第五站由台灣基進高雄黨部接手。七月二一「廣德家」收tio̍h韓粉所寄的銀紙,頂面寫「祝你發大財」。   

有的店家hō͘韓粉舞kah關門,七月十六,森梵新鐵板料理佇面冊PO文指出講,因為厝主是韓粉,致使in被迫關店搬厝,干單營業到八月初。  

 七月初六,m̄-nā無響應韓國瑜市長所喝出來的「高雄觀光日」打折,顚倒霸氣宣布停業三工,大聲喝bē giàn賺韓粉的錢hit間「勇記無敵菜頭粿」,擋韓粉的攻擊bē-tiâu,發出聲明放棄「割草任務」停止in的罷免韓國瑜市長活動。  

 Hō͘韓粉點名六間「不友善韓粉店家」之一的鼓山釣客食堂,七月十七佇面冊發文「佇韓粉熱烈支持之下,本食堂已經有國稅局,衛生局,消防局kah環保局來過ah,mā已經全部檢驗合格」,但是阮決定店休。七月二三,鼓山釣客食堂決定重新開業,而且向霸凌in的四十六位韓粉提出控告,食堂表示,「恬恬,m̄是表示阮驚戰;霸凌,m̄是表示恁敢戰」,這段時間無理性霸凌阮的四十六位韓粉,一個都免想beh走,beh告in告到底!   

「順韓者昌、逆韓者亡!」韓國瑜kā韓粉寵sēng kah比早前的警總koh khah歹,佇高雄霸凌商家、市民的時,韓國瑜市長無出半聲。萬不幸hō͘韓國瑜當選總統,咱攏tio̍h生活佇韓粉恐怖統治下的台灣。若按呢tio̍h真悲哀oh!
 
< Prev   Next >