首頁 arrow 綠色短評 arrow  韓國瑜用白賊話煽家己的嘴phóe!

 韓國瑜用白賊話煽家己的嘴phóe! PDF Print E-mail
Written by 李南衡   
Thursday, 08 August 2019

 七月二八,高雄市長韓國瑜正式得tio̍h中國國民黨全國黨代表大會的提名,代表參加2020總統大選,韓國瑜佇提名演講中大聲喝講beh hō͘國旗佇全世界颺颺飛。韓國瑜現講現落氣(làu-khùi),伊behchit句話進前,台仔頂無小影一下,歸個會場連國旗都無看tio̍h半枝,那好意思喝講beh hō͘國旗佇全世界颺颺飛咧!往年全代會舞台頂插kah全是國旗kah黨旗,今年那會完全變一個款?有設計師分析講是為tio̍h配合中國的「中央電視台」,beh播出的畫面使有中華民國國旗。攏mài有國旗,省得hō͘中國播出的時拍「馬賽克」。

韓國瑜佇提名演講中講,2020年總統大選是「保衛中華民國的戰役-攸關中華民國的存亡。」民進黨卓榮泰主席聽bē落去,佇伊的面冊頂面唱聲:「今年三月,韓市長當你行入去中聯辦的時,mài講當場有提起中華民國抑無,相信hit陣你心內連想tio̍h都m̄敢想中華民國,檢彩連你家己是高雄市長都bē記得了了去ah?」韓國瑜市長入去中聯辦chit件代誌有小小說明的必要,你才會知影民進黨卓榮泰主席那會hiah呢受氣。今年三月二二至二八,高雄市長韓國瑜去香港、澳門、深圳kah廈門訪問,三月二二入去香港中聯辦拜會香港中聯辦主任王志民,三月二三入去澳門中聯辦拜會澳門中聯辦主任傅自應。中聯辦的全名是:中央人民政府駐香港(澳門)特別行政區聯絡辦公室。佇香港(澳門)比特首koh khah大koh khah有權,有人講in是香港(澳門)的太上皇。In的職務是:第一,聯繫外交部駐香港(澳門)特別行政區特派員公署kah中國人民解放軍駐香港(澳門)部隊。第二,聯繫並協助內地有關部門管理佇香港(澳門)的中資機構。第三,促進香港(澳門)kah內地之間的經濟、教育、科學、文化、體育等領域的交流kah合作。聯繫香港(澳門)社會各界人士,增進內地kah香港(澳門)之間的來往,反應香港(澳門)居民對內地的意見。第四,處理有關涉台事務。第五,承辦中央人民政府交辦的其他事項。   

 韓國瑜是第一個入去中聯辦的台灣地方首長,伊強調談話的內容是:「個人過去工作,人生甘苦,某kah囝仔,香港kah高雄的未來,像按呢天南地北。」那像一個人入去妓女戶,出來講伊干單kah妓女話山話水niā-niā,你敢愛信?Che明明是韓國瑜家己踏入去「一國兩制」的「陷阱」,直接承認中國佇香港(澳門)成功實施「一國兩制」,中國借韓國瑜的人頭,來宣傳「一國兩制台灣方案」,按呢beh那猶有啥物「中華民國」咧!    

可憐ah,韓國瑜用白賊話煽家己的嘴phóe!
 
< Prev   Next >