首頁 arrow 綠色短評 arrow 漏洩國家機密罪!?

漏洩國家機密罪!? PDF 列印 E-mail
發表者 李南衡   
2009/07/24, Friday
        佇阿扁政府時代擔任台灣駐瑞士代表六年久e5王世榕,退休一年了,將伊駐瑞士e5外交經驗寫作回憶錄《直言》,最近由玉山社出版公司出版。那像伊佇「自序」內底所講e5Che六年e5外交生活,才hou7koh khah瞭解台灣政府猶原是一隻古井水雞,外交部內底e5官僚氣會hou7be7喘氣。佳哉外交部一寡少年人猶清新拍拼,台灣民間猶活力無窮。伊講,伊老老實實ka7所看所聽e5寫出來,只不過是beh表達落伍制度及封建文化害死人,用意m7beh攻擊啥人。伊講,若是因為chit本冊,會tang3 hou7外交部佇人事制度及官場傳統有所檢討,伊個人就真歡喜。

       

        王代表啊,免歡喜。外交部講你chit本《直言》內底有ka7外交部內及外館往來e5電報內容寫出來,算是「漏洩國家機密」,外交部beh研究採取法律行動。全台灣嘩一下!連《中國時報》ma7be7做得,罵講:「雞毛蒜皮也當機密!」,用咱台灣話是講「連chit號幼幼屑屑小可代誌也算作機密!」

        你敢知,「漏洩國家機密」是專制獨裁國家凌遲無罪e5e5一種特殊罪名。聽講ti7蘇聯獨裁者不里茲嬭夫(Brezhnev)時代,有一個蘇聯人佇莫斯科紅色廣場真細聲ka7e5朋友講,咱e5領導者實在是白癡。無想tioh8 hou7特務仔聽tioh8 ka7掠去,法院判伊十年罪。Chit-e5人問講我干單講咱e5領導者實在是白癡,是按怎判chiah重?法官講,公然侮辱國家領導者判罪一年,另外九年是你「漏洩國家機密」。伊問講:逐個攏知e5代誌那是「國家機密」咧?

        香港《文滙報》派駐大連記者姜維平,ti7一九九六年六月至九月期間,陸續化名佇香港《前哨》雜誌發表「原大慶市長錢棣華包飼二十九個伙計」、「瀋陽市副市長去澳門一輸三千萬」等文章,得罪tioh8原本遼寧省長薄熙來,伊是中共大老薄一波e5後生,按呢be7ah!二000年十二月姜維平hong5掠去,翻轉年五月秘密審判判八年,罪名是「危害國家安全、漏洩國家機密」。0一年,姜維平佇獄中得tioh8「保護記者委員會」頒hou7e5「國際新聞自由獎」。

        二00三年阿扁總統叫逐個提高警戒,中國已經佇沿海地區布置四百九十六粒飛彈。親民黨立委林郁芳指責阿扁總統漏洩國家機密,上懸會使判死刑。阿扁總統若是有漏洩ma7是漏洩敵國e5機密,林立委m7知是to2一國e5立委?害咱聽kah霧煞煞。一九六二年蘇聯佇古巴裝飛彈,美國總統甘迺迪以全國性廣播hou7全國人民知影,佇美國hong5阿佬,無人罵伊「漏洩國家機密」。

        按呢,你就知影「漏洩國家機密」chit-e5罪名偌呢好笑!

  

1:華語「洩漏」,台語tioh8讀作「漏洩」(lau7-siat)

2:「雞毛蒜皮也算機密」,請用華語唸。

最後更新 ( 2009/07/24, Friday )
 
< 前一個   下一個 >