首頁 arrow 綠色短評 arrow  柯文哲臭尻川畏人挖(ùi lâng iah)

 柯文哲臭尻川畏人挖(ùi lâng iah) PDF Print E-mail
Written by 李南衡   
Wednesday, 28 August 2019

  台北市長柯文哲定定講一寡足奇怪的話,伊講台灣美國中國的關係,台灣那像是土匪beh搶銀行(美國)的錢,攏無注意有警察(中國)佇邊仔金金監視。柯文哲beh phô͘中國的尻川,見笑kah kā咱台灣比作是土匪、中國講作是警察!美國總統一再罵中國講一年美國搶幾千億美金,tio̍h kā中國賣去美國的產品加重稅,聽起來明明是中國khah sêng土匪。柯文哲講台灣kah中國的關係是「兩岸一家親」,明知中國裝兩千外粒飛彈向台灣、三不五時派軍艦kah軍機佇台灣四箍圍se̍hse̍h去,按呢武嚇,是beh按怎親?真濟台灣人chit「兩岸一家親」,是柯文哲學中國國家主席習近平講的。有人懷疑柯文哲那會ùi伊家講的「深綠」變作紅的?柯文哲一再辯解講是人伊抹紅。

六月十二,台北市長柯文哲佇媒體專訪的時,指「旺中集團」總裁蔡衍明原本是支持伊,但是伊「m̄聽話」,koh暗中指講「我若無照蔡的意思發言,chiah-ê話tio̍h會ùi高雄市長韓國瑜的嘴裡聽tio̍h」;第二工,蔡衍明講伊家己記持無好,請柯市長幫忙回想是叼一句話?六月十五,《中天》記者問講,蔡衍明到底要求你講啥物?柯市長笑講,「伊家己都記bē清楚,我mā記bē清楚。」《中天》記者koh問,為什麼記bē清楚koh beh按呢講咧?已經四天ah攏無回答?八月十七,記者koh問chit件代誌,柯市長才講,其實是恁旺董的「無色覺醒十大主張」lah。無色覺醒十大主張是舊年九合一選舉前,蔡衍明the̍h出的想法,包括取消兩岸交流各種障礙、棄捒政黨惡鬥、全力拚經濟等,希望藉由chiah-ê主張激發新一波的民主改革。蔡衍明隨時回唱,講伊有kah柯市長會面十外遍,希望柯市長講清楚「你、我kah國台辦之間的關係。」八月十八,柯文哲再唱旺中集團講,余紀忠死後若會知一定會大聲哭bē煞,伊當年辦的中國時報那會變kah現在chit款?媒體會使有立場,但是mā bē使傷過偏離作為第四權的格!   

八月十九暗時,柯文哲接受電視專訪的時講起大選,伊講中國大陸自了m̄-bat聰明過,in一直扮演上大的豬隊友,永遠都bē變聰明。害真濟人驁一tiô,柯文哲那會kā 不管時beh吞咱、beh拍咱的中國當作豬隊友咧?   柯文哲無交待,伊那會kah中國的「傳聲筒」、伊講逐個攏知影的紅色媒體-旺中集團蔡董-ē會面十幾遍?感情應該m̄是普通,到底攏teh講啥?伊kah國台辦是啥闗係?Chit遍伊kah旺中集團蔡董-ē是起屁面冤家、抑是teh答嘴鼓?   

柯文哲臭尻川畏人挖,hō͘旺中集團蔡董-ē一下挖開,原來kah猴san仔仝款,紅的lah,一個尻川紅phà-phà!
 
< Prev   Next >