首頁 arrow 綠色短評 arrow 韓國瑜的「塞仔」,有學問!

韓國瑜的「塞仔」,有學問! PDF Print E-mail
Written by 李南衡   
Wednesday, 18 September 2019

 六月二五,高雄市長韓國瑜出席中國國民黨總統初選政見發表會,頭一遍用水、浴缸、塞仔,來比喻美國、中國、台灣的關係。伊講,逐個攏知影,中國kah美國那像teh行象棋的兩個棋士,象棋有車、馬、砲、卒等棋子(kî-jí)。台灣一直講無愛作人的棋子。假使台灣若干單是人的一粒棋子,時間一下到,無價值tio̍hhông hiat掉。抑是咱beh換一個角色,咱身軀足thiámsiān的時,真想beh浸一個浴。咱是beh作一粒棋子?抑是beh作一個塞仔?Beh浸浴tio̍h需要一個大浴缸,tio̍h需要大量的水。但是若無一個塞仔,tio̍h無法度浸浴。台灣beh作人的棋子抑是塞仔?Che是兩千三百萬台灣人tio̍h愛決定的。

韓國瑜講中美關係那像兩個teh行象棋的棋士,咱台灣無愛作人的棋子。伊講到chia相信逐個應該攏聽有。伊講台灣若無愛作人的棋子,忽然間,kā中美台的關係用浴缸、水、kah浴缸的塞仔來作比喻,kā台灣講作浴缸的塞仔chit點,老實講實在是聽無。中國kah美國是按怎會變作浴缸kah水的關係,kā台灣比作塞仔是啥意思?塞仔有啥作用?   

政論家「汪浩大哥」佇政治性談話節目中講破,咱才知影韓國瑜真正了不起!因為四月三十,韓國瑜有喝出:「立足台灣,胸懷大陸,放眼世界,征服宇宙。」的口號,「汪浩大哥」講宇宙上大的問題是佇星系中心的超大質量「烏洞」,韓國瑜的「塞仔」the̍h去kā「烏洞」塞起來,tio̍h天下太平ah!   

七月十九下晡,大雨佇南台灣車桶倒,有網友整理大高雄有七個區,包括三民區十位、苓仔寮四位、鳳山區四位、鼓山區兩位,小港區兩位,楠仔坑三位有淹大水。事後時代力量表示:「淹大水是叼一位市長?敢講是韓國瑜市長bē記得kā『塞仔』拔(puih)起來?」   

Chit幾禮拜,中國國民黨總統參選人韓國瑜的民調,那像西北雨-直直落,無論是叼一個媒體、叼一個機構所做的民調,攏ká那食tio̍h瀉藥瀉bē止。資深媒體人黃創夏講,chit陣韓國瑜上需要的tio̍h是「塞仔」。   

中國國民黨總統參選人韓國瑜最近風波無斷,四界攏有人teh傳說中國國民黨中央有beh「換韓」,意思是講beh kā中國國民黨提名的總統參選人韓國瑜換掉。九月初二,韓國瑜佇面冊直播表示,設使「換韓」是真的,按呢tio̍h是中央黨部頭殼入水lah!資深媒體人黃創夏講,chit-ê時陣中國國民黨中央黨部上需要靠「塞仔」,所以千萬m̄-thang「換韓」。   

好得有名政論家開破,咱才知影,韓國瑜的「塞仔」是chiah呢有學問!
 
< Prev   Next >