首頁 arrow 綠色短評 arrow Kā郭台銘罵kah hiah歹聽,taⁿ咧?

Kā郭台銘罵kah hiah歹聽,taⁿ咧? PDF Print E-mail
Written by 李南衡   
Wednesday, 25 September 2019

九月十二,鴻海創辦人郭台銘宣布退出中國國民黨,佇聲明中嚴詞抨擊中國國民黨,中國國民黨隨時回應講beh照「中國國民黨黨員違反黨紀處分規程」辦理,講會tàng撤銷黨籍抑是開除黨籍。中國國民黨考紀會主委魏平政koh放調講:「是你退黨,阮tio̍h法你。」那像「烏道」的氣口。

 

外界攏想講郭台銘有可能會tī中秋連假了後去登記參選,無疑誤伊tī九月十七連署登記截止日的前一暗十一點,宣布伊無beh參加2020連署競選總統。中國國民黨煞講郭的退黨聲明「情節無嚴重」,一般預料郭的黨紀問題最後會以「大事化小、小事化無」收尾。中國國民黨大大細細攏希望郭台銘轉去中國國民黨做夥拍拚,郭的幕僚緊講:拜託mài koh鬧ah!   

郭台銘退黨的時,台北縣前縣長周錫瑋批評郭台銘「鬧有夠抑未?」、「忍你、讓你,m̄是驚你!」郭台銘無beh參選總統,緊謳咾郭台銘「聰明、顧大局。」  

 針對郭台銘kah柯文哲九月十一去新竹城隍廟參拜,中國國民黨立法委員陳宜民唱聲講「M̄知媽祖chit遍有kā郭台銘託夢抑無。若有佇城隍廟咒誓,tio̍h先講清楚,若無照呼照行出門tio̍h會hō͘車lòng死!」Chit-ê thīn韓國瑜的立法委員陳宜民,烏白咒誓人hō͘車lòng死,那像庄腳的看牛囝仔hiah呢無教養。聽講伊是bat作過高雄醫學大學副校長的教育家。聽講郭台銘無beh選總統,陳宜民教授煞謳咾郭台銘有「急流勇退的大智慧」。   

八月二五,台中山海屯聯誼會佇豐原舉辦秋節聯誼,大甲鎮瀾宮董事長顏清標致詞的時講,中國國民黨總統參選人初選已經出爐,韓國瑜贏17%,但是有人輸了m̄甘願,「有錢是in兜的代誌lah!歹性地的直beh擋bē-tiâu」,外界解讀顏清標是teh摳洗郭台銘。顏清標可能bē記得伊參選立委的時,郭台銘專工拚轉來台灣替伊徛台,he mā是郭台銘第一遍替人徛台助選。九月十七,聽講郭台銘無beh參選總統,顏清標緊發表聲明講伊真激動kah感佩,郭董有影是高瞻遠矚而且氣度寛宏,是永遠的中華民國派,伊按怎攏是為tio̍h台灣的前途。   

郭台銘宣布退出中國國民黨,隔日九月十三,中國國民黨籍立法委員沈智慧佇面冊發表千字文,大罵郭台銘「關公的面敢bē koh khah紅!」聽tio̍h郭台銘忽然間宣佈無beh參選總統,沈智慧緊發文講:「『同志』做bē成,『志同』抑是『道合』攏誠好。」伊koh講對郭台銘「欽佩koh感動!」   

咱攏知,相罵無好話,但是也m̄是有諾深的仇、諾大的恨,那tio̍h罵kah hiah歹聽,罵罵一下,taⁿ咧?
 
< Prev   Next >