首頁 arrow 綠色短評 arrow 莫名其妙!teh罵啥人?

莫名其妙!teh罵啥人? PDF Print E-mail
Written by 李南衡   
Wednesday, 02 October 2019

 九月初十下晡,「喜樂島」決策委員歐崇敬,傳出伊會去中選會領表參選總統,消息一下傳出來,歐崇敬過往的爭議行為一項一項hông the̍h 起來談。像講歐崇敬少年時期加入中國國民黨,2008年大選綠營大輸了後,伊轉到民進黨想behtio̍h 2009年嘉義市長選舉提名人的資格。2011年,歐崇敬又koh接受中國國民黨徵召去台南艱困選區參選立委。2015年,歐崇敬退出中國國民黨了後開始接近親民黨,代表柑仔營參選新竹市立委。中國國民黨洪秀柱參選總統的時,伊bat家己宣布是副總統人選。另外,2016年,有人質疑「不當黨產處理委員會」前委員楊偉中,政治大學碩士學歷是造假的,歐崇敬mā kah人罵摻落去。事實證明,楊偉中有讀政治大學台灣史研究所碩士班,而且發表論文、口試及格,不過伊無辦理離校手續,照校方規定,猶未完成離校手續的猶原會使申請the̍h tio̍h英文碩士學位證明書。

2011年,歐崇敬以中國國民黨黨員身分參選立委的時,有接受香港《中評社》採訪,m̄-nā支持“ECFA”《兩岸經濟合作架構協議》,而且講伊家己beh hō͘選民知影che是一個thàng錢的政策,會tàng改善台南學甲kah將軍選區的漁民生活。歐崇敬當時有講,伊bat做過九個月的民進黨黨員,但是佇中國國民黨卻有二七年資歷,所以伊對中國國民黨的忠誠度是免質疑的。「喜樂島」有一點失覺察的是,事先那會無請教歐崇敬一聲,伊作中國國民黨黨員二七年,作民進黨黨員九個月,伊按算beh作「喜樂島」黨員幾工?敢講「喜樂島」kah柯文哲籌備beh組成的「台灣民眾黨」仝款無品,糞埽無分藍綠,認真作「資源回收」的工作,無管啥物色的糞埽,來者不拒攏總收?  

 Khah趣味的是,chit位身為「喜樂島」決策委員的歐崇敬,講beh代表「喜樂島」參選2020年總統,九月十三伊tio̍h去中選會領表,伊表示九月十七進前「喜樂島」黨中央若無推出任何人,會hō͘支持者失望,按呢伊tio̍h beh出來選總統。聽tio̍h chit-ê新聞,有網友喝講:「四月初一戇人節已經過去足久ah!」有人講chit-ê新聞「娛樂性真懸!」Kā歐崇敬的動作當作笑話。   

「喜樂島聯盟」決策委員歐崇敬,早前有去中選會領表beh參選明年2020年總統,無疑誤九月十五,傳出來伊已經辭掉「喜樂島」決策委員,而且已經退黨ah,按算beh以無黨籍的身分參選新北市立法委員。聽tio̍h chit-ê消息,「喜樂島」副主席兼發言人施正鋒罵講,歐崇敬chit種行為實在是「莫名其妙」!

 戇戇的選民,想beh問講:莫名其妙!teh罵啥人?  
 
< Prev   Next >