首頁 arrow 綠色短評 arrow 柯文哲市長的EQ是鴨卵!

柯文哲市長的EQ是鴨卵! PDF Print E-mail
Written by 李南衡   
Wednesday, 23 October 2019

十月十三早起十點二九分,《自由時報》記者張瑞楨的即時新聞報導,台北市長、台灣民眾黨主席柯文哲,今仔日透早八點tio̍hin黨提名的台中市第三選區立委參選人張睿倉佇大雅掃街拜票,現場人氣bē-bái,真濟買菜的阿姆阿伯抑是少年的父母,搶beh kah柯文哲翕相,續落in去永興宮參拜,佇永興宮內歇睏的時,副主任委員陳連生謳咾柯市長體力好,是是有吃啥物「好料的」(意思是補品)?柯文哲笑笑仔講,伊猶會tàng騎一日雙塔(一工內騎自轉車雙塔往回),並無食啥物好料,「食安、食安非他命。」逐個聽tio̍h,雖然哈哈大笑,m̄-koh mā感覺tio̍h chit話雖然有可能是滾笑,但是有可能會「留屎尾」,所以趕緊勸柯文哲「m̄-thang亂講」,koh提醒柯文哲「有媒體(記者)在場」。

第二工十月十四,佇台北市議會質詢的時,市議員汪志冰當場要求台北市警察局長陳嘉昌,應該隨時kā市長驗尿,若有吸毒tio̍h送勒戒,若無tio̍h以妨礙公務法辦,陳嘉昌語氣為難一直強調市長對緝毒大力支持,會去了解前因後果,徛佇邊仔的柯市長干單直直hàiⁿ頭苦笑。路尾柯文哲市長卻講,he是門關起來私底下所講的話,koh強調是因為廟方一直問,伊才會滾笑按呢講。   

柯文哲市長上愛展伊的“IQ”157,“IQ”「智商」是「智力商數」英文的縮寫,tio̍h是一個人智力的水準。Hō͘咱想起美國哈佛大學心理學教授高曼(Daniel Goleman),tī 1995年出版一本“Emotional Quotient”《情緒商數》縮寫作“EQ”「情商」。Hông尊稱作「“EQ”之父」。伊講,“EQ”tio̍h是管理情緒的能力。伊kā“IQ”kah“EQ”做夥the̍h來講,伊講“IQ”懸、“EQ”mā懸的人,春風得意;“IQ”無懸、“EQ”懸的人,得貴人相助;“IQ”懸、“EQ”無懸的人,懷才不遇;“IQ”無懸、“EQ”mā無懸的人,一事無成。伊講因為激情會壓倒理性,所以講滾笑tio̍h受理性控制,講滾笑bē使講過頭。一個人的成功,“IQ”的作用干單佔20%,chhun的80%是“EQ”等因素,也tio̍h是按怎做人的道理。一個人若無具備情感能力,欠缺自我意識,bē曉處理悲傷情緒,無同情心、無同理心,m̄知按怎kah人和諧做夥,無管伊偌呢聰明,mā bē有大發展。

安非他命佇「毒品危害防治條例」中列作第二級毒品,危害社會誠大,柯文哲身為醫生,應該知影毒品的為害;身為台北市長、台灣民眾黨主席,那會使秤彩講講咧,kā安非他命講kah那像仙丹hiah呢好用,hō͘伊會tàng騎自轉車一日雙塔往回,傷過無負責任。事後辯解講是講sńg笑。按呢咱tio̍h知影,無管柯文哲市長家己ta-ta叫伊的“IQ”157,照咱看,柯文哲的“EQ”是鴨卵。
 
< Prev   Next >