首頁 arrow 綠色短評 arrow 講tioh8「和平協議」會hong5驚!

講tioh8「和平協議」會hong5驚! PDF 列印 E-mail
發表者 李南衡   
2009/07/31, Friday
        七月十五,紀念台灣解嚴二十二週年及對白色恐怖政治受難者e5追思,馬英九總統去參加e5時,ka7無人性e5白色恐怖合理化講是因為戒嚴,ka7台灣戒嚴三十八年、世界第一久、chiahbe7見笑e5代誌合理化講是因為國共內戰。上可惡e5是伊講,最後e5根源,就是mai3發生戰爭。為tioh8無愛戰爭,第一步tioh8先減少兩峽兩岸e5緊張,所以希望會tang3及對岸簽訂「和平協議」。

        Che絕對m7是馬英九總統神經線接無好勢,臨時亂亂講e5話,Che是中國國民黨及中國共產黨chit兩個雙生仔黨共謀e5奸計。中國國民黨主席連戰佇台灣總統選輸了後,走去中國請hit個烏道e5老大出手修理台灣,講號作「聯共制台」。二00五年四月二九去北京「和平之旅」e5時,宣讀國共兩黨主席會談新聞公報,講beh「促進終止對敵狀態,達成和平協議。」二00七年十月十五,中共中央總書記胡錦濤ka7「兩岸簽署和平協議」寫入去ine5正式文件。所以今年七月十五馬英九總統才會講beh簽和平協議。

  Chit兩個雙生仔黨惡毒e5所在,是一直beh ka7明明是特殊e5國及國關係、一旁一國e5台灣及中國,硬beh ka7化作「國內化」、台灣及中國煞變作國內問題,koh講因為兩黨e5內戰猶未煞,所以tioh8簽署「和平協議」。

  有讀歷史e5人聽tioh8「和平協議」攏會流凊汗!

  一八八四年非洲一個地區e5酋長無代無誌及德國e5一個探險家簽「和平協議」,第二年就淪作德國e5殖民地,hit-e5所在就是今仔日e5多哥。一九三九年八月二三,德國及蘇聯簽訂互不侵犯e5和平條約,無兩年,一九四一年六月二二,德國就對蘇聯宣戰。一九四一年四月,日本及蘇聯簽訂「日蘇中立條約」,兩國和平協議無beh相戰,一九四五年四月初五,蘇聯通告廢除「日蘇中立條約」,八月初九(也就是日本宣布無條件投降e5前六工),蘇聯向日本宣戰。一九四五年八月十四,蘇聯及中華民國政府簽訂「中蘇同盟條約」了後,蘇聯顚倒幫助中國共產黨拍國民黨,一九四九年十月初一,中華人民共和國宣布成立,第二工蘇聯就正式ka7承認,是全世界第一個承認中華人民共和國e5國家。

  兩個國家和平相處,無人會食飽傷閒去簽啥物「和平協議」。咱ui3歷史來看,會簽「和平協議」攏是兩國互相猜疑。協議簽了,強e5e5 hit國隨時會tang3變面,喝講「和平協議」無算數就出兵去拍對方。按呢,你就知影,台灣及中國六十年來無簽啥物「和平協議」,平安無事。馬英九總統順中國頭人e5主張講beh簽「和平協議」。若真正簽落去,咱就知影中華民國koh活無久ah
 
< 前一個   下一個 >