首頁 arrow 綠色短評 arrow 注意,台北市出現「幽靈列車」!

注意,台北市出現「幽靈列車」! PDF Print E-mail
Written by 李南衡   
Sunday, 09 August 2009
         咱台灣e5遠洋漁業相當發達及現代化,但是對漁船e5船長及船員來講是相當辛苦,in一出去就是歸半年。對漁船公司來講ma7是風險相當懸,一間漁船公司可能有十隻、八隻漁船仝時陣佇太平洋作業,in tioh8對每一隻船e5行踨去向把握kah清清楚楚,啥物時間to2一隻船佇東經幾度幾、北緯幾度幾,to2一隻佇東經幾度幾、南緯幾度幾,隨時攏ma7掌握好勢,而且每一隻船掠tioh8啥物魚偌濟噸,ma7攏隨時都有資料。問題是船隻敢be7失聯去?萬一若失聯會按怎?現代科技chiah呢發達、衛星導航及電腦chiah呢進步,會使講完全無可能失聯。永過外國確實有船隻失聯去,變作那像無人tehe5船、漂流佇海裡幾個月抑是幾年才hong5tioh8hit號船叫作「幽靈船」,俗名叫作「鬼仔船」,航海史上有幾na7隻誠出名e5幽靈船。  

    八月初六,台北市捷運柵湖線koh出代誌,chit遍不止嚴重,一停就是四點半鐘。原因講是中晝十一點五十三分,捷運柵湖線兩台網路交換器攏失常,行控中心掠be7 tioh8列車位置,致使全線停駛,一直到下晡四點二十分才恢復運營。停駛四點外鐘,影響旅客超過三萬人次。

當時有二十六列車佇線頂走,行控中心m7知影列車e5位置,是真危險e5代誌,若無全部停落來,列車會追撞相pong7,發生大車厄!好佳哉hit當時有二十一列車拄拄進站,另外五列車靠佇車站及車站中間e5軌道頂,tioh8由隨車員用手動e5方式,用低速ka7列車慢慢仔駛去上近e5車站hou7旅客落車。其中有一列車tiau5佇中山國中站及松山機場站中間,隨車員無法度用手動方式駛,捷運公司另外調動列車去拖,拖到中晝十二點五十五分也就是一點鐘後,hit列車才駛轉來中山國中站,旅客足足關佇車內一點鐘koh兩分。

hong5大驚一趒e5是,咱chit陣才知影,原來台北市捷運柵湖線所走e5範圍比太平洋koh khahbong2-bong2,害行控中心尋無二十幾列車e5確實位置。咱若責問台北市捷運局是按怎車門定定關be7好勢,in tioh8應講因為柵湖線列車是無人駛e5,完全電腦控制,致使比別線e5列車khah敏感,門才會關koh開、開koh關。就是講台北市捷運柵湖線khah特別,是無人佇車頂駕駛e5

哦!台北市捷運柵湖線列車是無人駛e5,八月初六,行控中心竟然掠be7 tioh8無人駛e5列車位置,按呢,che二十六列車敢m7是煞變作「幽靈列車」?二十一世紀e5今仔日,會tang3tioh8台北市捷運出現幽靈列車,會使講咱全體台灣人真有眼福。咱歡喜做夥喝一聲:福氣啦!

Last Updated ( Sunday, 09 August 2009 )
 
< Prev   Next >