首頁 arrow 綠色短評 arrow Chit號總統敢是你選出來e5?

Chit號總統敢是你選出來e5? PDF 列印 E-mail
發表者 李南衡   
2009/08/14, Friday

    咱會記得十冬前e5九二一大地動,第二工,「無國界醫師」日本分會e5一陣醫師就拼到台灣來,intioh8救援e5要求,會派上近e5分會ti7二四點鐘內趕到災區。因為in足清楚:救災救命是生及死teh giu2大索,早一點鐘早一點鐘好,早一工早一工好。

 

    八月十二,行政院及立法院會商救災事宜,民進黨立委蔡同榮及王幸男批評國軍無一開始佇黃金時間投入救災。國防部長陳肇敏一再強調,若beh調派兵力救災,一定tioh8「照一定e5程序申請」。m7知立委當場有吐血抑無?八月十三為tioh8水災沖歹去e5知本溪堤防,四十外個工兵當teh拼命架設倍力橋,聽tioh8號令「立正!」隨時徛騰騰,佇日頭中央聽來視察e5國防部長陳肇敏訓話四十分鐘。知本e5災民及救災工兵,敢be7想講:若無chit號國防部長m7知偌好!

  美國國務院講若有需要,intang3派救難隊來鬥相仝。外交部hou7各駐外館處e5電報講:若有beh捐錢救災,請in寄兆豐銀行國外部某一個帳號,若有駐在國政府抑是民間beh提供救援物資抑是派遣救援團隊,請ka7婉謝。等待救援e5災民若知影外交部按呢講,敢be7想講:若無chit號外交部m7知偌好!

行政院發言人蘇俊賓講政府並無拒絕國際救災設備及人員,咱會ka7需要各國援助e5項目,做出一個清單,才來請in支援。M7知是m7beh等到鱉號?八月十三才列出七項。你敢be7想講:若無chit號行政院發言人m7知偌好!

  八月十三,行政院長劉兆玄講啥人指責國軍干單派空軍直升機救災爾爾?我昨昏已經派陸軍加入救援。伊講e5昨昏是八月十二,離八八水災已經過了四工khah加,也就是已經過了九十六點鐘以上,m7知減救偌濟人?增加偌濟破碎e5家庭?chiah-e5災民敢be7想講:若無chit號行政院長m7知偌好!

  國際媒體批評台灣救災亂操操。但是八月十三,馬英九總統答覆國際媒體問伊「對chite5風颱,台灣敢be7 tang3準備koh khah齊全?」伊應講:「因為南台灣自了m7 batchiah嚴重e5風災,所以民眾一時無做好充足e5準備。若有做好準備,民眾就會提早撤離,m7-koh inkan-na2 beh死守佇家園。」全體台灣人敢be7想講:若無chit號總統m7知偌好!

  馬英九總統敢是你選出來e5?若m7是,你干單會tang3吐大氣,無管心肝底偌呢怨嗟ma7無效,tioh8覺悟,台灣人猶koh有二年十個月e5苦難。Chit號總統若是你選出來e5,請你出力搥心肝搥三下,暗中懺悔,ka7全體台灣人、特別是chite5災民chhe7 m-tioh8、會失禮。

 

 

註:「立正」 請用華語念

最後更新 ( 2009/08/17, Monday )
 
< 前一個   下一個 >