首頁 arrow 綠色短評 arrow 白賊九硬beh ka7台灣變作白賊國!

白賊九硬beh ka7台灣變作白賊國! PDF Print E-mail
Written by 李南衡   
Friday, 28 August 2009
        馬英九佇舊年總統大選進前講若hou7伊當選總統會「馬上好」,當選了後馬上bai2,緊koh講另外一個白賊:「m7是馬上好,是馬上漸漸仔好。」結果台灣m7是馬上漸漸bai2,是馬上大bai2。選舉進前講伊若當選總統,會tang3 hou7台灣達到「六三三」-經濟成長率六葩以上,平均國民所得美金三萬箍以上,失業率三葩以下。伊就任一年外,六葩以上是失業率m7是經濟成長率;經濟成長率m7但連一葩都無、主計處講今年經濟成長率是負四點0四葩;平均國民所得連美金兩萬箍都無可能。所以人才會ka7馬英九叫作「白賊九」。  

        有chit號白賊總統,文武百官當然tioh8會相爭講白賊。一張外交部e5電報tioh8需要偌濟人講白賊?八月十一,台灣中部南部及東部已經有幾千幾萬災民,已經有四百外人失踨,四界山崩厝淹橋斷人埋。真濟及咱無邦交 e5國家及非政府組織,一直要求beh拼來台灣救援,外交部趕緊用「特急」電報,叫國外各館處緊kang5「婉謝」拒絕。照前總統府副秘書長陳其邁e5講法,正常外交部公文程序,重要公文電報beh發出去進前,一定tioh8 hou7總統府秘書長、處理外交事務e5副秘書長、及國安會秘書長各一份。經過三長參詳了後作建議,才呈送總統作決行。新聞媒體一下piak孔,煞變作總統府講m7知,國安局ma7m7知。外交部長出國由次長夏立言代行,伊ka7雷公借膽?關係tioh人命及救災、會使講是天大地大e5代誌,攏無hou7頂司知影,敢按呢大主大意決行?無代無誌tioh8來講白賊作「余文」。國安局恬恬無喘氣五工後,才講in有接tioh8外交部e5電話請示,in有叫外交部去問國土安全室,國土安全室的張志宇講有問消防署講m7免外國救援,消防署講完全m7知影有chit項代誌。

  有人責備行政院長劉兆玄佇大災難e5八月十一,猶有心情去染頭鬃。八月十八中英文記者會,馬總統講劉院長有ka7伊承認hit工是去剪頭、m7是去染頭鬃。結果第二工,電視新聞提出八月十一及十二所翕tioh8劉兆玄院長e5頭鬃來對照,原本十一頭殼頂e5白白e5頭毛腳,十二已經染kahsim3-sim3。行政院劉院長那會敢向馬總統講白賊?因為馬總統是「白賊九」!

  馬英九佇伊e5“治國週記”講:「災區e5民眾攏真善良,雖然有真大的哀痛,有強烈e5抱怨,但是卻無指責,顚倒是對政府有真懸e5期待。」有看電視e5人攏有看tioh8tioh8災民對馬總統講:陳進興一遍刣死一個人,恁一遍hou7四百外人埋佇土底,恁比陳進興koh khah可怕!講chit種話敢m7是指責?

  白賊九硬beh ka7台灣變作白賊國,可惡!

 
< Prev   Next >