首頁 arrow 綠色短評 arrow 戇話siau2話大車拼!

戇話siau2話大車拼! PDF 列印 E-mail
發表者 李南衡   
2009/09/04, Friday
        十冬前,九二一透早一點四十七分大地動,李登輝總統ti7一點鐘內就命令兵力投入救災。埔里佇hit工下晡就看tioh8國軍teh救災,路攏歹去,in是按怎拼到位?in是透早兩點外開始急行軍到災區。今年八八水災,中央政府痲痺幾工了後才精神開始救災,有人要求軍方鬥相仝,國防部長講tioh8照正常程序來申請,行政院長講chit遍救災動作比九二一khahkoh khah好。  

        Chit遍新流感,世界衛生組織警告講真嚴重,一定tioh8提高警戒,ka7預防及治療做好。全世界e5人攏真緊張驚惶。當咱teh討論疫苗準備好抑未?國光藥廠e5疫苗tang時才會赴hou7國人來注?若是tioh8新流感,治療e5藥仔有夠用無?上好是新流感mai3來,若來咱ma7希望愈少人tioh8愈好。咱e5衛生大官是m7是為tioh8疫苗猶未準備好來辯解,伊講:有人疫苗注了就往生。伊講che話有影會hong5驚死!有人問伊,既然疫苗無夠,咱那會無愛緊ka7外國買咧?伊應講全世界攏買無,啥人有才調買tioh8、甚至貴五十葩,我tioh8 ka7伊跪。Hong5tioh8,過兩工講伊已經買tioh8 ah!講伊會使向家己跪。

  Koh一個ma7是衛生官,講是啥物防疫中心中部主任,伊講chite5新流感原本是預定年底舊曆過年hit陣會大流行,過年時仔大流行也會直?無想tioh8 chit陣就提早來,伊講「爽斃了!」換作咱台灣話是講「有夠爽、爽kah beh死!」咱實在m7知新流感提早大流行,伊爽啥?有啥thang爽?Chit種戇話就那像七月底,台灣所有e5水庫攏已經見底ah,足濟人期待風颱緊來哦,帶一寡雨來hou7水庫止嘴焦。風颱有來boh?來了按怎?有夠戇!咱應該做e5是按怎教育逐個寶惜水、節省用水,防止不肖之徒亂銼樹,按怎種樹保護水源。衛生大官應該做e5是,好好介紹chit遍新流感是啥?及一般流行性感冒有啥無仝?宣導按怎ka7個人衛生做hou7好,按怎預防新流感,按怎接受治療?那有hit種戇人講hitsiau2話,新流感提早流行伊會「爽kah beh死」洌?

  Chit遍台北市主辦「聽障奧運會」,聽講開幕式中國隊無beh參加。台北市一個官員罵講,ti7「聽障奧運會」前,高雄市長陳菊thiau5工去邀請達賴喇嘛來台灣,致使中國隊決定無beh參加「聽障奧運會」開幕式。陳菊市長邀請達賴喇嘛來台灣南部是為chit遍八八風颱災民消災祈福,及「聽障奧運會」開幕式中國無beh參加一點仔關係都無,mai3按呢be7生牽拖厝邊。七月十六高雄市主辦e5世運會開幕式,中國隊ma7無參加,hit陣猶koh是啥人邀請啥人來台灣?

  那有chiah濟戇話及siau2話?嗯,有可能是「歹年冬厚siau2人!」

 

 

註:「爽斃了!」 請用華語唸

最後更新 ( 2009/09/04, Friday )
 
< 前一個   下一個 >