首頁 arrow 綠色短評 arrow 聽tioh8官員講「咱國是主權國家」誠歡喜!

聽tioh8官員講「咱國是主權國家」誠歡喜! PDF 列印 E-mail
發表者 李南衡   
2009/09/11, Friday

        咱攏猶會記得,舊年十一月中國海協會長陳雲林來台灣,及馬英九總統見面e5時稱呼馬總統「馬先生」,馬總統講伊會tang3接受。害全台灣e5人攏驚一趒:伊敢m7是中華民國e5總統?真奇怪佇公開場合那會hong5叫作「馬先生」?koh khah奇怪e5是竟然馬總統講伊會tang3接受。

        你家己若無尊重家己,beh叫啥人尊重你?所以,chit遍八八水災外國e5媒體看kahsian,用英語稱呼馬英九總統「chit-e5人」(this man),其實若翻譯作台語「chit箍」是koh khah倚意。那會按呢?因為馬英九總統一直無想講伊當選e5是中華民國總統。親像chit遍九月初七舉辦e5八八水災全國追悼大會邀請各宗教團體參加,內政部ka7「台灣基督長老教會」寫作「台灣區基督長老教會」,內政部ka7一百外年歷史e5「台灣基督長老教會」烏白改名作「台灣區」,事後無會kah一句失禮。有人看馬總統「棉被m7睏,蚵殼車畚斗」,無想講家己是中華民國總統,譬相伊是中國e5「台灣區長」,是m7是因為按呢,內政部想講馬總統有影是「區長」、才硬ka7「台灣」變作「台灣區」?

  九月初九新聞報導,有一位bat及國際聽障奧會總會有khe5e5美國籍查甫人,前幾工theh合法e5證件入境,而且主動通知國際聽障奧運會總會,講伊已經來到台灣ah。國際聽障奧運會總會恐驚hit-e5人干擾比賽,要求咱國治安單位採取相關保護措施,甚至表明希望hit-e5tioh8離開台灣。移民署發言人胡景富講,經過瞭解了後有去尋hit-e5人說明,叫伊be7使去干擾任何比賽。咱移民官員講,外籍人士來台灣若有做任何違反台灣法律e5活動,情形嚴重e5,無排除會tang3 theh申請入境及實際活動無仝作理由,要求hit-e5人離境。

  有新聞媒體罵講,chit-e5美國籍查甫人既然已經hou7國際聽障奧運會總會列作「不受歡迎」e5人物,咱那會使hou7伊輕鬆入境咧?咱移民署高階官員講:「咱國是主權國家」,對「不受歡迎」人物,有咱一定e5機制,be7 tang3干單憑一個國際運動總會將特定人士列作in無歡迎e5人物,咱tioh8ka7伊列作「不受歡迎」人物。無hit號代誌!

  自從馬政府上台以來,咱真懷疑大大細細e5官員猶會記持「咱國是一個主權國家」?頂禮拜,台灣行政院劉院長beh落台,新院長吳敦義beh上台,中國新華網稱呼咱e5行政院長是「台灣當局行政機構負責人」,chit-e5時陣,會tang3tioh8移民局高階官員講「咱國是一個主權國家」,表示並m7是馬政府內底e5官員攏是軟骨頭e5,實在真歡喜!

 
< 前一個   下一個 >