首頁 arrow 綠色短評 arrow 司法是壓be7倒e5!

司法是壓be7倒e5! PDF Print E-mail
Written by 李南衡   
Friday, 18 September 2009

咱攏知,無論按怎捒、按怎壓,「壓不倒仔」就是壓be7倒。外來e5力量有可能hou7伊一時歪歪搖搖、hian2hian2去徛be7在,總是外來力量若無去,伊真緊就koh恢復正常,徛kah四四正正。「壓不倒仔」e5底座大koh重,又koh圓圓那像半粒球,頂半身khahkoh輕,重心真穩真在。

早前有一位司法界e5老前輩,指伊桌頂hit仙「壓不倒仔」,對一位大企業家講:司法就親像「壓不倒仔」,無論啥人都ian2be7倒、壓伊be7倒。大企業家啥物話都無應,ka7伊頷頸仔hitkohkohe5金旆鍊剝落來,真細膩ka7旆佇「壓不倒仔」e5頷頸頂頭,「壓不倒仔」就頭殼犁犁犁。Hit-e5企業家講,戰後自從中國國民黨政府來統治台灣了後,台灣就開始流行一句新e5俗語話:「法律千百條,不如黃金一條。」大企業家講,掛佇「壓不倒仔」頷頸仔chit條金旆鍊,無拄拄是金旆鍊,有時是權勢、有時是地位、有時是對生命安全e5恐嚇。壓力超大e5時,就會hou7「壓不倒仔」頭夯be7起來。

  特偵組經過收押偵察結果,ka7阿扁前總統起訴。承辦審理e5是台北地方法院法官周占春,ti7二00八年十二月十三,周占春法官裁定阿扁前總統無保開釋。台北地方法院開兩遍庭長會議了後,ti7十二月二五,決定扁案改由原本承審前總統夫人吳淑珍案e5法官蔡守訓合併審理。引起司法界及輿論大驚惶,台北地方法院那會使按呢做?Che是違反「法定法官原則」neh!法院就是恐驚有外力介入,致使無法度維護「審判獨立」,所以審理法官採用「隨機抽案」,也就是用「liu-鬮仔」e5方式來決定,「法定法官原則」是獨立審判e5核心。台北地方法院用庭長會議來決定、以行政命令臨時換法官,真明顯是違反咱國憲法第八十條e5規定:「法官依據法律獨立審判,不受任何干涉。」in做出違法違憲e5處理,照理in e5行政主管tioh8提出糾正。無!關係tioh8前總統審判e5程序正義chiah大條e5代誌,那會使無糾正?按呢落去,蔡守訓審理扁案若是違法違憲,伊所做e5判決ma7會變作無效。所以真濟人期待咱e5大法官,會tang3 ti7九月十一日扁案宣判進前釋憲,說清楚講明白,到底蔡守訓等三名法官審理扁案有違憲無?九月十一,蔡守訓己經ka7阿扁前總統及夫人判無期徒刑ah。真可惜,一直到今仔日,大法官攏無講半句話。

司法是「壓不倒仔」,是永遠壓be8e5!咱對司法當然有信心,咱chit陣看tioh8 e5「壓不倒仔」並m7是倒去。一陣大法官頭殼犂犂那像teh沈思默想,「壓不倒仔」只不過及hit陣大法官仝款、頭犂犂、頭夯be7起來nia7-nia7

 
< Prev   Next >