首頁 arrow 綠色短評 arrow 台灣按呢teh「中國化」!

台灣按呢teh「中國化」! PDF 列印 E-mail
發表者 李南衡   
2009/10/02, Friday

九月三十,教育部長吳清基去立法院作施政報告及回答立委e5質詢,一上台就稱呼在場e5立委:「各位領導」,民進黨籍立委管碧玲聽了真火著,質詢e5時稱呼伊:「中華人民共和國派駐台灣e5教育部長」,擔任教育委員會主席e5洪秀柱大聲罵講:「失禮,咱chiachit-e5人。」不准吳清基部長上台備詢,管立委問洪立委是按怎會使剥奪伊質詢e5權利?洪秀柱立委宣佈息睏。息睏了,繼續頂場e5質詢,管碧玲立委稱呼教育部長「吳清基先生」。

真奇怪,擔任主席e5中國國民黨籍立委洪秀柱聽tioh8教育部長吳清基稱呼在場立委「各位領導」,那會攏無反應?聽tioh8民進黨籍立委管碧玲稱呼吳基基是「中華人民共和國派駐台灣e5教育部長」,伊tioh8大細聲叫吳清基部長be7使上台接受質詢。若按呢,為啥物吳清基部長稱呼in「各位領導」e5時,洪秀柱立委無直接反應講:「吳清基同志,早上好!」

另外,吳清基部長koh上台接受質詢e5時講,假使立委若認為伊用「領導」這兩字無適當,伊以後就mai koh用。借問,伊按呢講是啥意思?是m7是講,假使恁若攏無意見、無認為我用「領導」chit兩字並無適當,我此後會繼續按呢稱呼恁「各位領導」?chit種心態e5人作咱台灣e5教育部長,統管全國教育e5最高行政主管,佇公開場合chhoe7頭使用中國e5用語,你敢be7煩惱?

咱猶會記得,舊年二00八年五月,馬英九就任總統了後就直直欹過中國hit旁。十月二五,台灣人發動六十萬人遊行唱馬,路攤仔ma7來插花仔賣一寡民主運動e5商品,有一位女警teh取締攤販e5時,有人問伊憑啥物來取締?你e5頂司是啥人,hit位女警應講:「是中華人民共和國」,害警政署長開記者會「會kap賠」,講hit位女警服務年資傷淺、外勤經歷不足、及民眾應對進退e5能力無夠好、koh傷緊張,才會失言。

中國古早有一個楚靈王合意細腰e5查某人,有人講是宮中、有人講是全國,有真濟查某人為tioh8細腰m7敢食飯煞來餓死。

馬英九總統就任以後一直欹向中國,逐個攏看有,致使馬政府e5大細粒官、甚至連基層e5女警ma7知影tioh8按怎想、按怎做、按怎講,就是ka7中國看作in頭家背後e5大頭家。按怎ka7台灣「中國化」、徹底「中國化」,愈緊愈好,已經變作馬政府大大細細官員e5共識及運動ah。咱攏知,人e5話是心e5聲,心肝底一直teh想啥,才會順嘴講出啥,絕對m7是啥物「失言」。

台灣人啊,到chit陣猶未覺醒?真悲哀哦!

  

註:「領導」  「吳清基同志,早上好!」 請用華語(中國普通話)念

 
< 前一個   下一個 >