首頁 arrow 綠色短評 arrow 馬英九鑄銃拍家己?

馬英九鑄銃拍家己? PDF 列印 E-mail
發表者 李南衡   
2009/10/12, Monday
        原本「博愛特區」是指總統府周圍管制khahe5所在,聽講為tioh8國家元首e5安全起見,beh ka7現此時馬總統tehe5中興寓所納入「博愛特區」,「博愛特區」會加pong3大五倍,範圍ui3中正區pong3到萬華區。末來新博愛特區內e5所有建案,攏tioh8送台北市都發局都市設計審議委員會審議通通,才會tang3申請建照。未來區內建物限懸二四公尺,差不多八樓懸。已經起好猶未theh tioh8使用執照、親像「一品苑」大廈beh按怎?市政府e5講法是:超過二四公尺懸e5部分應該拆掉、抑是超懸e5部分禁止使用。已經theh tioh8台北市政府許可建照e5十一棟大樓beh按怎?將來起好ma7beh發使用執照hou7 in

        台北市真濟舊社區等待三、四十年beh都市更新,若照台北市都市發展局長丁育群所講e5擴大「博愛特區」,已經ti7今年八月初十公告,預定明年二月完成細部計劃,按呢中正區萬華區一寡舊厝就永遠無可能「都市更新」囉!

  台北市議員無分藍綠,佇市議會砲轟台北市長郝龍斌,認為台北市政府無應該無顧tioh8市民e5利益,擴大博愛特區、凌遲台北市民來扶馬英九總統!有市議員罵講:博愛特區那會無愛pong3到淡水河?有市議員罵講:若國安特勤無法度保護馬總統e5安全,請總統搬厝!

  一下hou7輿論、市議員及市民攻擊,台北市政府緊講he是總統府e5意思,總統府講是台北市政府過頭積極,總統府推kah離離離。九月三十,台北市長郝龍斌宣布撤銷台北市政府八月初十發布e5「總統府kap總統寓所周邊地區」所有建案tioh8經過台北市都審會審議公告,也就是無beh擴大博愛特區ah

  Chit遍上關鍵e5問題是擴大博愛特區及限制樓懸。已經起behe5「一品苑」,是馬英九作台北市長e5時「核定」e5hit陣馬市長無想tioh7國家元首e5安全!今仔日馬總總統才想tioh8一棟hiahe5大樓佇身軀邊無安全。咱台灣人講一個人害人無死、害家己,抑是自作自受,俗語講:「林道乾鑄銃拍家己。」  林道乾是明國時代e5人,ti7鄭成功拍台灣e5一百冬前tioh8佇福建、廣東沿海出沒e5大海賊。伊bat hou7明國都督俞大猷剿kah走無路,匿來台灣e5雞籠、赤嵌,伊e5腳跡有到呂宋、安南、邏羅(今仔日e5菲律濱、越南、泰國)。最後bih佇邏羅e5北大年。伊e5死亡有一種傳說,講伊佇大年港鑄砲鑄銃,無注意銃管piang3破、彈死家己。

  馬英九市長批准e5「一品苑」煞威脅tioh8幾年後馬英九總統e5安全。日後台灣有可能會流傳一句新俗語:「馬英九鑄銃拍家己!」

最後更新 ( 2009/10/12, Monday )
 
< 前一個   下一個 >