首頁 arrow 綠色短評 arrow 恭請特偵組出馬!

恭請特偵組出馬! PDF Print E-mail
Written by 李南衡   
Friday, 16 October 2009
        台北市捷運內湖線自從今年七月初四通車以來,一再發生事故,因為及原本e5木柵線連起來,所以有人叫伊「柵湖線」,華語念起來那像是「poah8kiau2」。聽講beh改名作「文湖線」,加開市民血汗錢一億,就會改運。「柵湖線」e齣頭實在有夠濟:車門關koh開、開koh關、關be7起來;行控中心尋無車輛走去to2,短短十四點八公里長e5車路,那像比太平洋koh khah闊;中山國中站「be7斷電系統」煞來斷電,害七百外名旅客佇高架頂頭行鐵枝路;車停佇高架頂頭猶算是好運,有一早起停佇大直站及台北機場站中間e5基隆河下底,暗so-so、門be7開、冷氣停掉,好佳哉停五分鐘nia7-nia7,若是停半點鐘,人無死去ma7剩無半條命;車廂內底那會落雨?外面落大雨,車內落小雨,外面停了雨,車內猶落雨;小說明一下,車內並m7是定定會落雨,外面有落大雨車內才會落小雨。失禮失禮,話講了傷緊,彼工外面無落雨,車內ma7chhop8-chhop8滴,查起來講是冷氣孔漏水;高架頂頭e5路面講也會pit去。你想會tioh8及想beh tioh8 e5奇奇怪怪e5現象攏發生出現過。真濟現象攏會使申請世界紀錄,台北市無啥物比別國首都kah gau5,至少提「柵湖線」會暫停e5理由,絕對蓋倒全世界。

「柵湖線」暫停已經m7是「三不五時仔」,親像八月二九、三十,利用拜六禮拜來做大檢修,二八暗提早暗時十點收班,「柵湖線」偏偏「he5 be7teh嗽」,拜五暗九點外tioh8 be7be7動。經過兩工大檢修應該無問題才tioh8!無疑誤八月三十日拜一煞一工停三擺,假那照三頓停咧!真濟人建議,「柵湖線」停止營運十工抑是半個月,等待問題攏解決了才koh來營運,台北市長郝龍斌堅持無beh停。是m7tioh8等到一工照三頓停以外koh加一擺「飲下晝茶」,抑是koh加一擺宵夜,一工停五擺,郝市長才甘願喝小停一下?

  Chit一年外,最高檢察署e5特別偵查組辦阿扁前總統e5案辦kah嗄嗄叫,一日到暗佇電視新聞出現,那像誠拼勢teh辦案。扁案已經辦一個坎站ah,敢be7使拜託「特偵組」撥一個工「特別」來「偵察」台北市捷運內湖線一下?若有人講,「特偵組」是專門辦牽涉tioh8總統、副總統、五院院長、部會首長抑是上將e5貪瀆案件;抑是牽涉tioh8全國性選舉e5舞弊抑是妨害選舉案件。無哦!in猶一項是辦特殊重大貪瀆、經濟犯罪、危害社會秩序e5案件。公共交通工具一日到暗會停,關係tioh8幾十萬人e5安全,應該算是「危害社會秩序」!順續查看有重大貪瀆抑無?有經濟犯罪抑無?hou7台北市民小可安心一下。

  請逐個熱烈拍phok仔,恭請特偵組出馬!

 
< Prev   Next >