首頁 arrow 綠色短評 arrow 飼chiah大陣咬布袋e5猫鼠!

飼chiah大陣咬布袋e5猫鼠! PDF Print E-mail
Written by 李南衡   
Friday, 30 October 2009

        馬英九政府開放美國牛肉全面進口,有人罵參與談判e5衛生署「喪權辱國」。衛生署長楊志良十月二五講:伊be7 tang2接受chit種講法。伊強調,政府已經盡上大e5努力,雖然對牛目睭、腦、大骨及頭骨等四項危險部位無法度白紙寫烏字明列禁止,但是雙方已經有達成共識,美國「be7出口」chiah-e5部位hou台灣,而且衛生署技術上ma7會嚴格顧tiau5。楊署長無講清楚,是按怎「無法度白紙寫烏字明列禁止」咧?到底馬英九總統有啥物be7見眾e5代誌hou7美國人捋 tioh8咧?衛生署楊署長koh講:美國賣牛肉hou7咱,經過誠久長e5談判,三億美國人家己食「老牛」,賣台灣人三十個月以下e5「嫩牛」,tioh8 koh hou7咱「揀肥揀瘦」。楊署長那會無提起台灣人上驚e5絞肉及腹內仔咧?美國人ka7 in m7e5、上蓋有可能性有毒e5腹內仔賣咱,楊署長那會無haiN一聲?che已經m7是「食台灣米,講美國話」e5背逆,事實上是大大損害全體台灣人生命安全、「飼猫鼠咬布袋」e5行為。

        逐個看tioh8楊署長e5後壁bih一隻koh khah大隻e5猫鼠,講美國牛肉全面進口談判會輸kah褪褲,就是因為國安會秘書長蘇起主導e5。十月二九,蘇起辯解講政府決策e5原則:「第一個是安全,第二個是安全,第三個ma7是安全。」若有影按呢,全台灣e5人應該「感謝皇恩」才tioh8,那會m7但立法院民進黨團反對到底,立法院中國國民黨團邀請衛生署副署長蕭美玲去報告,立委大罵衛生署公然違反當初九十五年立院要求衛生署佇開放進前tioh8先向立法院報告。中國國民黨黨團書記長呂學樟罵蕭美玲副署長講:chit個若是你決定e5你落台,若是恁署長決定e5恁署長落台,若是行政院長決定e5行政院長落台!是按怎m7但民進黨執政e5縣市反對,決定採取全面抵制美國牛肉全面進口,連中國國民黨執政e5台北市、台北縣、台中市等縣市,ma7徛出來反對咧?因為逐個攏看出來,答應會致使「狂牛症」e5牛腦、骨髓、腹內仔、掛骨牛肉全面進口,會按呢全面倒,是敗佇一陣「咬布袋e5猫鼠」。

  逐個想講國安會蘇起秘書長後壁猶bih一隻koh khah大隻「咬布袋e5猫鼠」-馬英九總統。蘇起秘書長緊講:「che是十七個月來所有單位e5意見攏總合做夥e5集體決策,包括總統、副總統、及行政院長,逐個攏知影chit件代誌。」伊e5意思是講並m7是阮後壁hit隻大猫鼠,是所有大隻猫鼠e5代誌。

  Che就是咱台灣人上悲哀e5所在,二00八年三月,咱台灣人目睭是糊tioh8啥物?選出馬英九作咱e5總統,才會飼chiah大陣咬布袋e5猫鼠!

Last Updated ( Friday, 30 October 2009 )
 
< Prev   Next >