首頁 arrow 綠色短評 arrow 白賊治國e5中國國民黨政府!

白賊治國e5中國國民黨政府! PDF 列印 E-mail
發表者 李南衡   
2009/11/06, Friday

        最近《壹週刊》報導,舊年二00八年十二月十八,當今e5行政院長、當時e5立法委員兼中國國民黨秘書長吳敦義翁某、南投縣長李朝卿翁某等地方政要人士,做夥去印尼峇里島旅遊五工,內底有一個假釋期間中e5中部「烏道角頭」江欽良。Chit-e5消息引起台灣政壇大地動。

        十一月初四,行政院長吳敦義有回應講,伊五湖四海e5朋友攏有熟似,伊be7一個一個去問,你十五歲有做過啥歹代誌無?你十七歲有做過啥物「少年輕狂」e5代誌抑無?咱be7去問一個人二十幾年前有做過啥代誌。伊(江欽良)十幾年來做了真濟公益e5事,推動觀光人文夜市,開創地方真濟就業機會。伊已經改過向善ah,咱敢m7是講咱m7 thang排斥「更生人」,tioh8鼓勵伊,hou7伊發心向上造福koh khah濟人,周處e5故事敢m7是按呢?

  咱ui3吳敦義院長簡單講e5一段話就發現伊確實是正港e5「白賊義」。仝南投縣草屯鎮出身e5人,現任縣長、chit遍中國國民黨提名縣長候選人李朝卿競選連任「兄弟姐妹後援會」會長,今年一月十四,吳敦義以立委身份安排江欽良「特見」服刑中e5朋友郭平輝,吳院長講m7知江欽良e5底細,你敢會信?

  若是一個十五歲十七歲e5少年囝仔一時chhong2-pong7,腳步踏錯啥人無?江欽良並m7是干單做m7 tioh8一項代誌,伊十幾歲犯走私軍火等大案,包括十七歲槍殺彰化角頭張坤保了後逃亡、十九歲槍殺雲林縣議員林棋棟、第二年hong5tioh8,以殺人罪判刑二十年。一九八九年伊二三歲,藉腰子病急診戒護就醫逃亡,而後koh犯幾件恐赫暴力案件,犯過殺人、恐赫、妨害公務、結夥搶劫、竊盜、違反銃砲鶿刀械管制條例三十外項前科,一九九0年koh hong5tioh8 e5時才二四歲。二00二年,阿扁前總統進行特赦,江欽良刑期減到二0一七年,目前猶是假釋期間,二00四年擔任「草鞋墩人文觀光產業發展協會」理事長,今年七月開始擔任「埔里城假日觀光夜市」董事長。二00二年假釋到今才七年,beh按怎照吳院長所講e5,「十幾年來做了真濟公益e5事」咧?

  李朝卿縣長講峇里島之遊純然是私人旅遊,吳敦義院長講是旅遊考察,既然按呢,記者問吳院長舊年去峇里島旅遊,是啥人「埋單」e5?吳院長應講:我那會知?若是有影去考察,敢be7應講:我出我e5費用,別人e5代誌我m7知?

  馬英九當選總統了後,咱拄tioh8 e5「白賊九仔」tioh8足頭疼,無疑誤「一個騙無夠,兩個掠來鬥」,koh任命「白賊義」來作行政院長。佇中國國民黨政府白賊治國時期,請全國人民家己khah細膩khah保重咧!

  

「埋單」:這句香港來e5外來語,請讀香港發音mai5-tan

 
< 前一個   下一個 >