首頁 arrow 綠色短評 arrow 「打擊詐騙大行動」有夠假!

「打擊詐騙大行動」有夠假! PDF Print E-mail
Written by 李南衡   
Friday, 13 November 2009
        行政院宣布「打擊詐騙大行動」開始,訂十一月十二作全國反詐騙活動日,刑事警察局表示,十一月十二ui3早起八點到半暝十二點攏總十六點鐘,出動三萬四千外位警察及人民,也就是出動警力一萬一千六百0兩人、出動協勤民力兩萬兩千四百五十二人,佇全國一萬三千六百五十六個ATM自動提款機前分傳單叫逐個注意m7-thang hong5騙去,台北市koh khah 離譜,叫一陣女警穿少少裝作「辣妹」佇街路夯牌仔作宣傳,明明是teh ka7基層警察裝siau2 e5警察mai3算,動用兩萬四千外位民力、一工十六點鐘tioh8分兩班,除了兩個五十箍便當以外,一個人一工若算三百箍工錢,按呢,為tioh8行政院長一句無頭無總e5「全國反詐騙活動日」,千外萬新台幣、咱人民e5血汗錢那tan3佇水裡,「thom5」一聲nia7-nia7,到底會有偌大e5效果,實在真hou7人懷疑。

        聽講che是學日本「無詐騙日」e5作法,beh佇上蓋短e5時間喚醒民眾反詐騙意識,日本幾年前有舉辦「無詐騙日」活動,派警察到各ATM頭前勸阻民眾匯款,但是猶原有民眾佇警察面頭前hong5騙匯e5情況發生,佇日本引起媒體誠大e5震撼。好佳哉,咱台灣e5詐騙集團無hiah呢白目,警方講十一月十一監控詐騙集團e5時,有截tioh8詐騙集團通知車手,十一月十二chit工休假。警方講che已經發揮了功效。拜託咧,che是詐騙集團作面子hou7台灣警方,因為in除了chit工「公休」以外,一年猶有三百六十四工。Tioh8-ah!咱應該問行政院吳敦義院長,一年chhun-e7三百六十四工咱beh按怎?

咱看警方tioh8出一萬一千六百0兩人,大約佔行政警察e5四分之一警力,嚴重浪費警方人力。行政院吳敦義院長足好心講:m7-thang用傷濟謷力。che那像叫警察加班十六點鐘,才koh ka7警察講:為tioh8e5健康,恁tioh8khah濟時間好好歇睏。聽伊放屁,放臭屁!

  咱攏知,警察e5任務是:依法維持公共秩序,保護社會安全,防止一切危害,促進人民福利。防止人民mai3 hou7詐騙集團騙去,只不過是警察幾十項工作內底e5一項而已,一工用chiah濟人力去佇全台灣e5 ATM頭前作宣傳,敢tioh8?若是干單為tioh8一工無詐騙集團作歹,簡單koh省事,每年十一月十二全國ATM攏息睏就萬事OK ah!舊年一年台灣有四萬外人hong5詐騙去、損失金額有一百二十三億外,政府若真正beh為民除害,應該借用科技來破案、來掠歹徒。另外,拜託立法院修法加重詐騙集團主腦及成員e5刑期、罰則。照今年十一月十二按呢舞法,hong5感覺「打擊詐騙大行動」實在有夠假!  

註:「辣妹」,請用華語念。

Last Updated ( Friday, 13 November 2009 )
 
< Prev   Next >