首頁 arrow 綠色短評 arrow 用選票ka7馬英九拍分數

用選票ka7馬英九拍分數 PDF 列印 E-mail
發表者 李南衡   
2009/11/27, Friday
        二00八年總統大選,中國國民黨馬英九theh七百六十五萬外票當選總統、一時chheng3 kahbe7 tiau5。真悲哀e5是伊施政e5滿意度,那像「西北雨」一直落,che一年半以來hou7全國人民哀父叫母,有e5悽慘kah連哀都哀be7出聲。伊競選e5時畫一個「六三三」e5餅,講經濟成長率會達到六葩、每人國民所得美金三萬、失業率三葩以下。害真濟人票就按呢雄雄tng3 hou7伊,一年半以來e5情況拄拄顚倒反,經濟成長率m7但無成長、一個月一個月落、落kah變作無成長、落kah變負成長,破幾十年台灣e5紀錄;每人國民所得離美金三萬愈來愈遠、每人每個月所得顚倒減一兩千箍;六葩m7是經濟成長率、是失業率。原來馬英九所講e5攏是假e5,莫怪人會罵伊是「白賊九」。

        薪水無起tioh8真害ah,國營事業e5汽柴油、水電瓦斯chhoa頭起價,致使民生用品逐項toe7伊起,甚至連健保費講ma7 beh起,講啥物健保費若無起、健保局十年就會倒!是按怎健保費無隨時起?聽講是beh看十二月初五chit遍三合一地方選舉e5結果按怎,才beh做決定。若中國國民黨大敗,in當然m7kohbeh起,若選嬴,tioh8出在伊起囉!

  馬政府佇八八水災e5表現hou7人看破腳手、看出in e5無能及愚戇,原來馬政府是無半phiat!相信逐家攏猶會記得,二00八年總統大選e5時,中國國民黨及伊e5總統候選人馬英九e5廣告:「阮已經準備好ah!」chit-ma2已經證實hit句承諾是一張「柭仔票」。當時中國國民黨執政各縣市長e5人名及相片,ka7馬英九配後、ka7馬英九背書。一年半後e5今仔日,面對「阮已經準備好ah!」chit張「柭仔票」,chia e5縣市長當然有責任!chitin若有beh競選連任縣市長e5,請選民想看mai7chit種烏白kang5背書、及白賊九做夥講白賊e5人,敢會使kohhou7伊?若是中國國民黨提名新beh競選縣市長e5人,in攏是hit-e5白賊九作黨主席hit-e5黨所提名e5,敢會信得?

  Chit遍三合一選舉,你若有選舉權一定tiioh8轉去選;你若有親成朋友toa3佇有選舉e5縣市,拜託你加khah幾通電話,用選票ka7馬英九拍分數。伊四年總統任期按怎烏白亂舞咱攏無伊法,但是,咱chit遍若ka7馬英九分數拍ho7 bai2-bai2-bai2,算是hou7伊一個警告,伊tioh8會小可緊張,驚影響tioh8後一遍院轄市長議員及立委選舉,甚至二0一二年e5總統大選。按呢伊才有可能加減修改目前錯誤e5政策及作法。上起碼,汽柴油、水電瓦斯、健保費等等m7敢烏白起價。拜託,用選票ka7馬英九拍分數,咱此後兩年半會過khah快活!
 
< 前一個   下一個 >