首頁 arrow 綠色短評 arrow 台灣人用選票證明伊是「落屎馬」!

台灣人用選票證明伊是「落屎馬」! PDF Print E-mail
Written by 李南衡   
Monday, 07 December 2009
        二00九年十二月初五,台灣十七縣市舉辦縣市長、縣市議員及鄉鎮長選舉,選舉結果及一般預測差無真濟,總是無人敢預測中國國民黨會輸chiah慘、民進黨會嬴hiah爽。上主要e5原因是馬英九總統、ma7是馬英九黨主席。

        馬英九總統就任一年半以來,伊競選支票「六三三」無三兩工就變作「芭樂票」,失業人口日日增懸、收入直直落,人民都已經慘死了ah,國營事業e5水電柴汽油瓦斯chhoa7頭起價、那像佇火頂潑油,致使所有e5民生用品toe3 teh起,hou7台灣人真受氣;伊一直向中國hitphian5過去,hou7台灣人真驚惶;中國一個綠豆大e5官員陳雲林來台灣,那像in祖公來咧,ka7台灣拖倒轉去白色恐怖e5戒嚴時期,hou7台灣人真怨慼;八八水災因為看中國e5目色、m7敢接受美國日本等國際e5救援,失去救援上要緊e5黃金四十八點鐘,m7知偌濟冤魂teh beh chhoe7馬英九討命;照選罷法,咱無法度罷免伊,猶有兩年半伊總統做煞前進,台灣人那像對馬英九一點仔辦法都無、出在伊烏白亂舞。好佳哉有chit遍三合一選舉,人民會使用選票表達對馬英九總統e5不滿及氣憤。

  雖然中國國民黨有嬴十二個縣市長,總是無管是連任抑是新選e5,縣市長得票率攏降低,民進黨執政e5縣市,m7但攏有連任,而且得票率攏有成長增加,表示「綠色執政,品質保證」chit句話是真e5

  後山e5台東縣一向是中國國民黨e5鐵票區,chit遍大反盤,民進黨縣長候選人劉櫂豪會theh8 tioh8四十七點四一葩,相差五千外票;外島e5澎湖縣頂遍「博奕公投」無過,中國國民黨e5鐵票區開始生鉎,chit遍民進黨蔡見興得thioh8四十八點0七葩,票數相差五百幾票nia7-nia7

  Chit遍選舉hong5稱作「超級戰區」e5宜蘭縣,照民進黨縣長候選人林聰賢e5預估,雙方輸嬴差不多是兩三千票。除了現任縣長中國國民黨籍e5呂國華四年施政,無法度及過去二十幾年民進黨e5執政相比並,會hou7真濟宜蘭人數念宜蘭人真有尊嚴e5民進黨執政時代,其實林聰賢應該特別感謝中國國民黨主席馬英九chit-e5民進黨e5超級助選員,伊去宜蘭一遍,就趕一兩千票過來民進黨e5林聰賢chit旁,馬英九去宜蘭十一遍,最後一工去宜蘭兩遍加深宜蘭人e5印象,選舉結果就是ka7林聰賢贊一兩萬票。

  Chit遍三合一選舉,民進黨得票率四十五點三二葩,地方選舉猶m7-bat chiah呢好過,人民除了肯定民進黨執政e5縣市以外,上要緊e5一點是,台灣人用選票證明中國國民黨主席是「落屎馬」!

 
< Prev   Next >