首頁 arrow 綠色短評 arrow 選舉無師傅!

選舉無師傅! PDF 列印 E-mail
發表者 李南衡   
2009/12/11, Friday
        你若講:「選舉無師傅」,台灣人攏會隨時ka7你接落去講:「用錢買就有。」Che是戰後才流行起來e5一句台灣話「歇後語」。「歇後語」就是咱一般tehe5「孽仔話」抑是「激骨話」,意思是一句話講前半段,後半段免講出來,逐個ma7攏知影beh講啥。戰後中國國民黨政府來殖民統治台灣以後,che六十外冬,選舉買票會使講是in污染台灣社會上垃圾上惡毒e5「政績」之一,而且是愈來愈嚴重、愈來愈無款。

        二00九年十二月初五,台灣及外島十七個縣市長、縣市議員及鄉鎮長三合一選舉,照法務部e5資料,講受理偵辦賄選有兩千外件、已經起訴五十二件七十六人、覊押一百五十人,講chit遍涉賄人數及案件攏濟kah破紀錄。彰化縣查賄選查kah八個選區有七個淪陷,那像彰化縣滿路是銀票;金門縣選舉人不過七萬兩千五百0九人nia7-nia7,選前一禮拜講一票喝到一萬,比島內一票兩三千加四五倍,無疑誤十二月初五選舉hit工報紙報導講一票已經喝kah三萬loh!金光閃閃,候選人好額kah chit款、金門那像是用金仔khong5起來e5。花蓮縣光復鄉三個鄉長候選人「有志一同」、攏買票攏hong5收押起來,咱m7hit三個是m7是攏是中國國民黨黨員,咱干單知影當選hit-e5是中國國民黨員。檢察官講無論to2一個確定買票e5,當選攏無效。中國國民黨那會hiah愛買票咧?連嘉義市選監委員、中國國民黨籍e5黃作鏞都去替候選人買票hou7人掠tioh8。聽講in已經墮落kah用華語講:「不賄選就不會選」ah

  彰化縣一位承辦賄選案e5調查員接tioh8電話干擾,問伊「那會beh按呢做咧?」秘密證人遭受tioh8不明人士恐嚇。彰化地檢署檢察官真受氣,查辦了後才chhoe7 tioh8流失佇外面e5筆錄影本。莫怪四界分扇仔e5法務部長王晴峰,伊teh講啥物反賄選,會hong5準作扇仔搧過耳孔邊e5一陣風。

  若真正beh根除賄選歪風,第一、賄選案件應盡速佇半年內二審判決;第二、hong5判當選無效e5人,伊當選所領e5選舉補助款應該全部吐出來,像中國國民黨籍e5立委李乙廷、張碩文、江連福、廖正井領去e5成千萬咱老百姓e5血汗錢,應該全部還咱才tioh8;第三、因為賄選tioh8 koh辦理重選e5費用,一遍tioh8開一千四百萬外,應該由提名e5政黨負擔、無黨e5由個人負擔才有理。

  咱希望賄選會根除,十年二十年後,若有人講:「選舉無師傅-用錢買就有」chit句歇後語,hit當時e5少年人會講聽無,解說hou7 inchit句歇後語e5意思,in一定會感覺真奇怪,問講:恁hit陣那會hiah無水準、發生hit號代誌?
 
< 前一個   下一個 >