首頁 arrow 綠色短評 arrow 白賊九chhoa7一陣白賊七治國!

白賊九chhoa7一陣白賊七治國! PDF Print E-mail
Written by 李南衡   
Friday, 18 December 2009
        Ui3美國牛肉進口案,hou7咱看tioh8一陣白賊九e5大官虎teh講白賊。第一個白賊七是國家安全會議秘書長蘇起,伊講政府決策放寛美國牛肉進口有三個原則,第一是安全,第二是安全,第三是安全。伊e5話是若真e5,全台三大連鎖便利商店:統一超商、萊爾富、全家便利商店,那會ti7十二月十五宣佈加入自主管理聯盟,響應m7使用、m7販賣用美國牛內臟、牛絞肉及骨髓作食材原料e5產品?平平中國國民黨e5台北市長郝龍斌那會拚勢推捒「拒絕使用美國牛內臟、牛絞肉及骨髓自主管理聯盟」標章?那會有六千外間業者參加?逐個頭殼攏歹去ah?抑是人無相信chit-e5白賊起e5話咧?

白賊起koh講:「連我chiah呢驚死e5人,都認為(美國牛肉內臟、絞肉)無問題。」意思是講,按呢恁猶teh煩惱啥?外國有一位出名e5歌星替一個名牌e5薰做廣告講:「某某牌e5薰無影響tioh8e5聲喉!」有人去查出來,才知影hit位歌星根本無食薰,啥物薰ma7 be7影響伊e5聲喉。伊那像真老實,實在是講白賊。仝一個道理,蘇起秘書長是食菜e5人,根本無食肉,講hit號話明明是欺騙社會!

  國內反對聲浪真大,白賊起講雖然按呢ma7無可能重新談判,若koh重談判會影響台灣e5國際信譽;而且兩國e5議定書效力比國內法khah大!立法院長王金平一聲就ka7伊撞破雞胿講:「國內法位階當然比議定書khah懸!」若有影照白賊起所講按呢,立法院中國國民黨團佇beh修正e5食品衛生管理法,何mi2苦推翻政黨協商通過e5黃義交案咧?

  若照黃義交案,狂牛疫區牛骨頭、腦、目睭、骨髓、內臟、絞肉攏be7使進口。因為白賊九講一句「禁止進口無好」,所以就推翻政黨協商通過e5黃義交案,改由孔文吉提一個新案。佇輿論壓力之下,孔文吉立委ti7十二月初九召開記者會講:伊beh提報院會撤案。伊講伊e5案其實就是行政院衛生署版,向連署e5立委會失禮。伊講伊撤案是無愛伊e5名留佇惡案頂面。

  咱ui3 chia看出來衛生署長楊志良ma7是白賊七,一個行政官員原本就應該由伊e5單位提出政策送立法院審查,若是立法院無通過,伊看是beh修正伊e5政策,抑是beh堅持伊e5政策提出辭職。悲哀e5是白賊良講白賊,衛生署e5案偷請立委孔文吉提出,叫孔文吉作歷史罪人koh兼講白賊。

  白賊九kap白賊義歹chhoa7頭,致使滿朝文武百官愈gau5講白賊e5官位愈在,ham5-ban7講白賊e5轉去食家己,終其尾就是chhoa7一陣白賊七治國!

Last Updated ( Friday, 18 December 2009 )
 
< Prev   Next >