| 文章分類 |
|---|
|
|
| 台灣人be7爽！台灣人真爽！ |
|
|
|
| Written by 李南衡 | |
| Monday, 11 January 2010 | |
|
馬英九執政一年八個月以來，當時投票無選伊e5、及真濟選hou7伊e5人，愈來愈be7爽！伊競選hit陣開e5支票，啥物「六三三」目一下nih就變作「柭仔票」，伊一箍人直直向中國hit旁pheng7過去，中國一個綠豆大e5官員來台灣，那像in祖公來咧，ka台灣捒倒轉三十外年前e5白色恐怖時代；八八水災干單會曉會失禮、kang5行禮koh行禮，講tioh8救災是無半步；伊明知開放美國牛腦牛腹內是違反台灣民意，伊thiau工派國安會秘書長蘇起一行人去美國kap人簽美國牛啥物攏會使進口e5議定書，引起立法院無分藍綠、大多數立委e5反對，ka7通過修改食品衛生管理法來hou7伊知影一個鹹chiaN2，伊明明就是beh煽動台灣人反美，而後才khah好勢歸氣倚過中國，所以koh恐嚇台灣人講若無hou7美國牛啥物攏會使進口來台灣，會影響美國對台灣e5軍售，好佳哉美國國務院隨時講無hit號代誌，魚還魚蝦還蝦、m7通摻摻作一個。連一個真簡單H1N1疫苗注射e5代誌，ma7舞kah全國人民phi7-phi7-chhoah！Che二十個月來，台灣人是be7爽加be7爽koh加be7爽，台灣人實在是真be7爽！
一月初九，桃園縣kap台中縣各有一位立法委員tioh8補選。因為兩冬前立委選舉e5時，有買票嫌疑hong5掠tioh8，經過法院審判定案，宣判che兩個立法委員當選無效。Che兩個攏是中國國民黨提名e5，就是講競選hit陣有中國國民黨背書掛保證e5，taN hong5宣判賄選當選無效，提名in e5中國國民黨應該見笑kah頭夯be7起來才tioh8，無，m7但無，koh猶有面子提名人出來競選！一遍補選tioh8開五六千萬，應該由提名hit種候選人e5政黨來出補選費用才tioh8，taN由全國納稅人來負擔那有道理咧？桃園縣第二選區kap台中縣第三選區e5選民看了真be7爽！台東縣是因為鄺麗貞縣長讓人做，條件是新當選縣長黃健庭立委e5缺tioh8補選，換鄺麗貞來選，隱e5啦！因為佇台東一向是中國國民黨講按怎就是按怎，台東人看了ma7真be7爽！ 民主政治上蓋可貴e5一點就是m7免拍破人頭，用算人頭e5方式tioh8會tang3照人民e5意思改換政權。台灣人be7爽e5歸腹火，hit-e5氣行到手指頭仔，theh印仔真細膩佇選票頂面ka7 tng3落去，變作一張一張sui2 tang-tang e5選票。 Chit遍桃園縣、台中縣kap台東縣三個立委補選，民進黨提名e5郭榮宗、簡肇棟、賴坤成攏拍嬴中國國民黨提名e5候選人。那像民進黨主席蔡英文佇開票了後所講e5：Che m7是民進黨e5勝利，是台灣人ka7民進黨e5鼓勵！ 台灣人用選票教示馬政府講：「阮be7爽！」爽啦，台灣人真爽！ |
| < Prev | Next > |
|---|