首頁 arrow 綠色短評 arrow 馬英九放e5一pu5屎!

馬英九放e5一pu5屎! PDF Print E-mail
Written by 李南衡   
Friday, 15 January 2010
        台灣人講一個人做代誌無站節、有頭無尾、tioh8愛人ka7伊收尾,罵伊「放屎無拭尻川」。有人koh khah嚴重,代誌亂亂舞,表面上那像真好勢誠順序,人作伊去了後才發現代誌花屑屑,比「放屎無拭尻川」加真害,會使講是「放一pu5屎」佇hiahou7你去打疊收煞。

        咱那會去想tioh8馬英九放e5pu5屎咧?因為舊曆過年teh behah,真濟台北人攏會想起台北市長郝龍斌ti7舊年十月十三講,貓纜已經開九百四十五萬委託土木技師公會全國聯合會總體檢,預定十二月底完成,T16塔柱遷徙完工了後,會先運轉測試一個月,koh進行初勘、履勘作業,安全無問題了後tioh8會通車。算算一下,貓纜ti7舊曆過年前就會復駛。

  失禮哦,根據台北市政府上新e5資料,新塔柱纜線安裝作業預估會佇一月中完成,先進行一個月測試,koh執行履勘。可見舊曆過年前復駛是無望囉!

  二00七年七月初四,貓空纜車正式通車營運,卸任市長馬英九比伊e5大拇公講:我ma7會曉起貓纜!那像是講he是伊e5一大政績哦!無疑誤纜車煞佇半空中擋tiam7,馬英九及郝龍斌市長hip佇攝氐三十六度懸e5車廂內底,明明是teh hou7馬英九小鼻一下伊放e5屎是啥滋味。

  狀況一個黏一個,山區tan5雷公,貓空纜車行控室安全線控制電路板害了了,停駛;皮帶驅動輪故障,旅客吊佇半空中兩點鐘久,停駛;樹奶帶出問題,停駛;駛無三個月tioh8維修纜索。上大條是二00八年九月二八二九e5薔蜜風颱,造成「政大御花園」社區頂頭嚴重崩山,山區另外一旁ma7崩山,兩個崩塌e5所在離十六號及十五號塔柱十外公尺nia7-nia7。十月初一宣佈貓纜停駛一個月,安全無問題才beh復駛。十六號及十五號塔柱基座hou7雨水chhiang5 kah愈來愈大孔,差不多有一人懸,害下面e5居民驚kah beh死!

  Beh起貓空纜車hit當時,馬英九為tioh8閃開一寡評估,用娛樂設施才koh改作交通設施,環境評估及水土保持計畫攏無做,貓空纜車起好營運了後才會出現chiah濟問題。連干單會曉拍胡蠅e5監察院ma7講:前任市府規劃無完整,該規劃探勘e5地點做無好,驗收也做無夠好,確實愛負責任。Khah好笑e5是監察院mem7知臭講:當初猫纜e5興建決策正確、安全無問題、過程合法。借問一下,當時馬市長若有影按呢,chit-ma2那會hiah濟問題咧?莫怪中國國民黨立法委員羅淑蕾會問講:「因」若無錯,「果」那會m7-tioh8

  前任市長馬英九放e5pu5屎,害現任市長郝龍斌拭be5離!
 
< Prev   Next >