首頁 arrow 綠色短評 arrow 中國國民黨ui3根爛掉去ah!

中國國民黨ui3根爛掉去ah! PDF 列印 E-mail
發表者 李南衡   
2010/01/22, Friday
        桃園縣第二選區就是因為兩冬前中國國民黨提名e5廖正井賄選,hou7法院判決當選無效,所以才tioh8補選。Be7見笑e5中國國民黨猶有面提名人出來競選,in攏無想講為啥物桃園縣第二選區tioh8 koh補選?中國國民黨秘書長金溥聰koh敢大聲講:桃園人攏ma7知影to2一黨選舉會買票!聽起來那像是民進黨秘書長teh講話neh!按呢,咱就知影中國國民黨秘書長m7是普通e5 be7見笑!chit號黨敢猶有救?

        既然beh補選beh提名,中國國民黨ma7是想beh提名一位形象好、有可能會選嬴e5人出來拚。Ti7選前e5十二月三十,中國國民黨榮譽主席吳伯雄有去ka7陳麗玲助選,四個競選總部攏有踏腳到,而且大大阿佬「陳麗玲是一流人才」。補選前e5禮拜日,行政院長吳敦義、副院長朱立倫、秘書長林中森、立法院長王金平、中國國民黨副主席林豐正、縣長吳志揚攏有去楊梅鎮參加大型造勢會,按呢就知影陳麗玲偌呢受看重。行政院長吳敦義講,陳麗玲bat做過桃園縣觀光行銷局長、農業發展處長及環保局長,battioh8環保評比全國第一名,當然ma7會做上好e5立法委員。立法院長王金平ma7 ka7阿佬kah鬥舌!一月初八、補選e5前一暗,中國國民黨主席馬英九專工拚去桃園ka7e5學妹加油造勢;中國國民黨秘書長金溥聰佇補選前一再阿佬陳麗玲有潛力,敗選後koh再阿佬陳麗玲是一流e5候選人。事實上陳麗玲是第幾流e5人才咱無真清楚,不過,會tang3確定e5是至少佇中國國民黨眾大老、眾老大e5心目中是「一流e5」。

  Chit位中國國民黨一流e5局長、一流e5立委候選人、一流e5黨員,按怎看中國國民黨?落選hit暗,陳麗玲講:選民對大環境反感、對執政黨失望,攏是敗選e5原因。Ti7第二工展開謝票行程e5時,伊講:若照按呢落去,足煩惱續落去二月二七桃園縣第三選區立委補選,對中國國民黨非常不利。落選四工後e5一月十三是蔣經國總統過身二二年紀念日,中國國民黨主席馬英九去桃園大溪頭寮謁靈。立委落選人陳麗玲走去現場咒讖講,伊佇桃園會落選是因為地方黨工無teh振動,中國國民黨根本是ui3基層、ui3根爛掉去ah!中國國民黨徛佇雲頂hiah-e5眾仙,當然m7知影「ui3基層、ui3根爛掉去ah」是啥意思。秘書長金溥聰講,若是伊,伊be5按呢講。

  咱想想一下,中國國民黨眾大老講e5那像ma7m7 tioh8,陳麗玲有影是一流e5。若m7是一流e5,那有可能有hiahe5目色看出「中國國民黨根本是ui3基層、ui3根爛掉去ah」、koh hiah有膽識敢講出來咧!
 
< 前一個   下一個 >