首頁 arrow 綠色短評 arrow TaN,咱e5財產咧?

TaN,咱e5財產咧? PDF Print E-mail
Written by 李南衡   
Friday, 29 January 2010
        翁某會使講是互相上親蜜、上瞭解e5兩個人,若是鬧到beh離婚e5地步,ma7應該「好來好去」才tioh8。萬不幸相罵無好話,罵kah大細聲,啥物孔仔縫仔ma7攏總挖挖出來,雖然有夠歹聽,總是內底有真濟是外人一定想be7到、卻是有影bat發生過e5見笑代。

        仝款e5道理,一個中國國民黨縣黨部,對hitin從政e5同志當然有特別瞭解,講e5話人會信。舊年十二月縣市長選舉登記hit陣,新竹縣長鄭永金支持議長張碧琴競選縣長,中國國民黨中央認為張碧琴嚴重破壞團結,造成黨e5損害,十月初六暗決定開除張碧琴黨籍,鄭永金縣長若違紀輔選,beh用黨紀處分。中國國民黨新竹縣黨部腳手誠猛,第二工十月初七,就佇平面媒體刊登廣告、同時ma7散發仝款e5文宣品「鐵證如山」,講「縣長、議長聯手賣縣有地,掏空新竹縣庫」。內容有講:縣府標售e5土地猶未完成公共設施及道路,就急beh脫手,新竹縣政府財政虧空四百億,ti7 beh選舉前兩個月,聯手變賣超過十五億e5縣有地,hou7e5子孫背債務。」應該有真濟人會相信縣黨部所講e5話。張碧琴ma7知影代誌嚴重,hit下晡去地檢署按鈴控告,指中國國民黨不實e5廣告,傷害伊個人代誌khah細,傷害tioh8認真做代誌e5公僕代誌才是大條。伊講,標售縣有土地攏有經法定公告程序,並無m7-tioh8

既然一旁登廣告拍文宣講有人「掏空縣庫」是「鐵證如山」,另一旁講對方烏白亂講。事實干單一個nia7-nia7,無可能兩旁攏無m7 tioh8

        若是兩旁互相攻擊一寡個人私德e5代誌,咱會使ka7看作「新竹縣藍營內鬥」。但是,若講tioh8公家e5代誌,講有縣長及議長聯手出賣縣有土地,掏空新竹縣庫,按呢代誌就大條囉!咱期待新竹地檢署會tang3早早結案提出起訴。若確定是中國國民黨新竹縣黨部烏白誣賴鄭永金前縣長及張碧琴前議長,in m7但犯tioh8公然誹謗罪,tioh8 koh加一條違反公職人員選舉罷免法第104條:意圖hou7候選人當選抑是無當選,以文字、圖畫、錄音、錄影、演講抑是其他e5方法,散布謠言抑是傳播不實e5代誌,會tang3 hou7公眾抑是他人受損害者,處五年以下有期徒刑;若是ine5完全是事實,就愛辦新竹縣前縣長鄭永金及前議長張碧琴,m7但判刑koh tioh8in ka7所貪e5錢攏吐出來。chit件官司絕對be7使因為選舉了就假那無chit項代誌,「船過水無痕」。咱攏知影,新竹縣e5縣有土地就是新竹縣民e5財產,ma7會使講是咱全台灣人e5財產。Chit件官司無緊完結,咱若想tioh8就會koh來請教新竹地檢署:TaN,咱e5財產咧?
Last Updated ( Friday, 29 January 2010 )
 
< Prev   Next >