首頁 arrow 綠色短評 arrow 連台北圓山仔飯店也teh搶錢!

連台北圓山仔飯店也teh搶錢! PDF Print E-mail
Written by 李南衡   
Friday, 05 February 2010
        馬英九上台以來,beh做好代誌是無半phiat,伊上蓋gau5 e5一項就是hou7好額人愈來愈好額,散赤人愈來愈散赤,「富e5富拄天,散e5斷寸鐵。」m7免偌久台灣就會及香港相拚作世界貧富差距上大e5一個所在。Chiah嚴重e5問題,馬英九那像攏無看tioh8ma7假那攏m7知。社會問題直直浮現出來,上可怕e5犯罪事件就是「搶」!展開報紙來看,全台灣一工有發生四、五件搶案,實在會hong5驚。連台北市地標e5一0一大樓地下停車場,當頭白日都有兩位貴婦人連車帶人hong5搶劫去,而後人hong5 tan3佇荒郊野外。

古早中國各山頭有山大王駐在,王法管伊be7 tioh8,凡若行旅車輛beh對山路經過,山大王就伸手出來叫你「留下買路錢」。咱實在m7知影,啥物時代ah圓山仔飯店ma7自立山頭學人做山大王?

圓山仔飯店後山有一條劍潭山健康步道,最近台北市政府ma7佇網站頂面大力推廣,講hia有早覺會、山友會、羽球社等社團活動、相當鬧熱,請市民透早去行行看看咧。有真濟愛pehe5山友,透早天未光就佇hia活動,資歷khahe5有三、五年,小可算老資格e5已經有十外年,真正老資格e5人佇hia出入有四、五十年久ah,自了都m7-bat聽講透早來hia停車tioh8收錢,一點鐘八十箍!一般停車了去peh山小活動一下,再koh落山來開車,差不多tioh8三、四點鐘,一早起tioh8開兩三百箍neh!平常時仔每早起有成千人,週末假日有時ma7有上萬人。咱講圓山仔飯店teh搶錢m7是凊彩講講e5:第一,佇圓山仔邊仔e5大直「美麗華」商圈,停車費一點鐘ma7才三十箍nia-nia7。第二,啥人允准圓山仔飯店kang5收錢?圓山仔飯店當然會應講:台北市政府啊!真失禮,圓山仔飯店二00八年申請e5停車場登記證ti7舊年(二00九)十二月三十一日到期。m7-bat聽講pehe5人停車tioh8收錢e5圓山仔飯店,那會ui3今年二0一0年一月初一開始,要求登山客停車一點鐘tioh8付八十箍停車過路費咧?chitma7hong5感覺真奇怪。真拄好,ti7舊證過期、新證猶未領tioh8 chit-e5期間,圓山仔飯店非法經營停車場。聽講違反停車場法第三十七條tioh8處新台幣三千箍以上一萬五千箍以下e5罰款。違法收一個外月停車費收去一大檔e5錢去ah,那會驚你hit號零星e5罰款咧?

        放目容允圓山仔飯店做山大王ka7市民搶錢,台北市敢是無政府ah?時機bai2 kah連台北圓山仔飯店也teh搶錢,代誌才是大條!咱才會煩惱!
 
< Prev   Next >