首頁 arrow 綠色短評 arrow 中國國民黨「穿美國西裝-大輸!」

中國國民黨「穿美國西裝-大輸!」 PDF 列印 E-mail
發表者 李南衡   
2010/03/01, Monday

因為有四位立法委員ti7舊年當選縣長,二月二七tioh8補選桃園、新竹、嘉義及花蓮縣四個立法委員。中國國民黨因為ui3馬英九就任總統以來,見選見輸已經選輸三遍ah,選kah會驚。雖然明知chit遍補選chit四席就是攏hou7民進黨嬴去,ma7完全無影響tioh8中國國民黨佇立法院e5絕對多數及強勢。不過,in真驚選輸變作習慣性,所以才會喝講:chit遍有be7使選輸e5壓力。

票猶未開了,咱tioh8已經知影中國國民黨chit聲穩輸!第一,中國國民黨chit二十個月來一直輸上大聲e5藉口是:大環境bai2!有人想講大環境是指全世界e5金融海漲(tsu-nami),完全想歪去。金融海漲都m7是台灣一所在tioh8-che nia7-nia7。別國按怎koh peh起來?台灣按怎peh be7起來?失業率直直chheng3懸、薪水愈領愈少、交通罰單愈收愈濟張、公營事業e5水電瓦斯汽油起kah無一個款、台灣主權流失、直直pheng7過中國hit旁。台灣人心肝內攏真清楚,台灣e5大環境就是馬總統一人,好死m7死伊koh去兼中國國民黨主席。台灣人對大環境chit-e5e5怨慼,chhoe7 in黨提名e5候選人來出氣!

第二,中國國民黨堅守一個原則,就是:無原則。若是民調第三名e5陳學聖會使硬拗hou7伊變作候選人、講伊有爆發力、ka7民調第一名及第二名e5人踢邊仔,為啥物民調落後e5周錫偉tioh8退出新北市長e5提名?若是金小刀e5愛將吳睿穎e5情況會使用「啥人無過去?」來解釋、行政院長吳敦義會使講江欽良是「更新人」,是按怎講tioh8 chit遍花蓮縣立委候選人施勝郎就「政見一條、案底真濟條」咧?那像早前有一個歪心e5老師,拍一個學生囝仔講:你那會使讀冊讀kah啄龜?你看你邊仔e5阿明連啄龜ma7 teh讀冊!

第三,中國國民黨原性不改,佇四個選區攏是攏作負面惡質e5文宣,ine5主席、秘書長、地方頭人助講攏是政擊對手、烏白罵人,當然引起善良百姓e5不滿及受氣。連所謂形象清新e5學者,拄拄仔插政治,就表現出hit號款,實在真無彩!伊落選了是按怎koh倒轉去學校教育學生咧?

可能有人會講,若是論席次,chit遍中國國民黨ma7才輸兩席nia7-nia7。事實上chit遍中國國民黨及以前三遍仝款,輸kah真塗!綠色執政e5嘉義縣嬴三萬外票、得票率ma7增加十葩,桃園縣新竹縣所謂「藍大綠細」e5地區翻盤,就是連中國國民黨選嬴e5花蓮縣,in e5得票率ui3七成外落到四成九,民進黨蕭美琴e5得票率ui3二成外拼到四成一,王廷升才嬴伊六千外票nia-nia7

        中國國民黨干單有一點會hong5阿老,就是:穿美國西裝-大輸,好看哦!
最後更新 ( 2010/03/01, Monday )
 
< 前一個   下一個 >